राजपाको तर्फबाट महन्थ ठाकुर २ नम्बर प्रदेशको मुख्यमन्त्री उम्मेदवार

प्रदेश

काठमाडौं, १५ कात्तिक । राष्ट्रिय जनता पार्टी नेपाल (राजपा) अध्यक्ष मण्डलका संयोजक महन्त ठाकुर प्रदेश २ को मुख्यमन्त्रीको उम्मेदवार बनेका छन् । राजपाले ठाकुरलाई प्रदेश २ को मुख्यमन्त्रीको उम्मेदवार बनाउने निर्णय गरेको हो ।

उपेन्द्र यादव नेतृत्वको संघीय समाजवादी फोरमसँग चुनावी तालमेल गरेलगत्तै राजपाले ठाकुरलाई मुख्यमन्त्रीको उम्मेदवार बनाउने निर्णय गरेको हो । राजपा नेता लक्ष्मणलाल कर्णले भने, ‘अध्यक्ष मण्डलका संयोजकलाई मुख्यमन्त्रीको रुपमा अघि सार्ने सहमति भएको छ । तर, निर्वाचन क्षेत्र टुंगो लाग्न बाँकी छ ।’

ठाकुरको पैत्रिक गाउँ महोत्तरीको क्षेत्र नम्बर ३ मा पर्दछ । त्यसको ‘क’ वा ‘ख’मध्ये कुनै एकबाट लड्ने विकल्प उनीसँग छ । ठाकुरले यसअघि चुनाव लड्दै आएको जिल्ला भने सर्लाही हो । उनी त्यताबाट पनि उम्मेदवार हुन सक्छन् । तर, यसबारे निर्णय नभइसकेको नेता कर्णले बताए ।

यसैगरी राजेन्द्र महतो सर्लाहीबाट चुनाव लड्ने भनिए पनि उनको पनि क्षेत्र टुंगो लागिसकेको छैन । सिट बाँडफाँट अनुसार पर्साको क्षेत्रनम्बर ४ बाट प्रतिनिधिसभा उम्मेदवारको रुपमा लक्ष्मणलाल कर्णलाई अघि सारिएको छ ।

बुधबारमात्रै राजपा र फोरमले प्रतिनिधिसभा र प्रदेश सभामा सिट बाँडफाँट गरेका थिए । प्रदेश २ को प्रतिनिधिसभाका ३२ मध्ये १७ सिट फोरमले पाएको छ भने १५ सिट राजपाले लिएको छ । प्रदेशसभाको ६४ मध्ये ३३ सिट फोरमले लिएको छ भने बाँकी ३१ सिट राजपाले पाएको छ ।