अनेरास्ववियु र अखिल क्रान्तिकारीको बन्यो ११ हजार १११ सदस्यीय प्रचार समिति

प्रदेश

काठमाडौं, १५ कात्तिक । चुनाव प्रचार प्रसार गर्न अनेरास्ववियु र अखिल क्रान्तिकारीले ११ हजार १११ सदस्यीय प्रचार समिति गठन गरेका छन् । वाम गठवन्धनमा आवद्ध एमाले र माओवादीका विधार्थी संगठनहरुले ११ हजार १११ सदस्यीय संयुक्त चुनाव प्रचार समिति गठन गरेका हुन् ।

अनेरास्ववियु र अखिल क्रान्तिकारीको आज बागबजारमा बसेको संयुक्त बैठकले ११ हजार १ सय ११ सदस्यीय चुनाव प्रचार समिति गठन गरेको हो । भेला, प्रशिक्षण र चुनाव प्रचार संयुक्त रुपमा गर्न समिति गठन गरिएको अखिल क्रान्तिकारीका उपाध्यक्ष सुरेन्द्र बस्नेतले जानकारी दिए । उनले भने, ‘अब हाम्रा भेला, प्रशिक्षण र चुनाव प्रचार संयुक्त रुपमा नै हुनेछन् । आगामी निर्वाचनमा वाम गठवन्धनलाई जिताउन आजैबाट हामीहरु परिचालित भएका छौं ।’

अनेरास्ववियु र अखिल क्रान्तिकारीले आजै दिउँसो बागबजारमा उपत्यकास्तरीय संयुक्त भेला आयोजना गरेका छन् । भेलालाई एमाले नेता शंकर पोखरेल र माओवादी नेता वर्षमान पुन ‘अनन्त’ले सम्वोधन गर्दै आवश्यक निर्देशन दिने अखिल क्रान्तिकारीका उपाध्यक्ष बस्नेतले जानकारी दिए ।