रोल्पामा सिंचाई राज्यमन्त्री पुनलाई लक्षित गरी बम विष्फोट, विप्लव कार्यकर्ता आशंकामा

प्रदेश

रोल्पा, ३० कात्तिक । रोल्पामा सिंचाई राज्यमन्त्री अमरसिंह पुनलाई लक्षित गरी बम विष्फोट भएको छ । स्वर्णवती गाउँपालिका–१, बाद्रिवनमा कांग्रेस उम्मेदवार समेत रहेका राज्यमन्त्री पुनलाई लक्षित गरी बम विष्फोट भएको प्रहरीले जनाएको छ ।

बिहीबार दिउँसो उनलाई लक्षित गरी बम विष्फोट भएको जिल्ला प्रहरी कार्यालय रोल्पाले जनाएको छ । सुत्ली बम प्रहार भएको हुन सक्ने प्रहरीको अनुमान छ । घटनामा कुनै क्षति भने नभएको प्रहरीले जनाएको छ ।

चुनाव विरोधी विप्लव समूहले बम प्रहार गरेका हुन सक्ने आशंका गरिए पनि विप्लव नेतृत्वको नेकपाले भने अस्वीकार गरेको छ । पार्टीका राप्ती व्यूरो इन्चार्ज केशबहादुर बाँठाले आफूहरु शान्तिपूर्ण रुपमा विरोध गरिरहेको भन्दै नेकपाको नाममा तेस्रो पक्षले फाइदा उठाएको प्रतिक्रिया दिएका छन् ।

यसअघि रोल्पमा माओवादी केन्द्रका नेता वाम गठबन्धनका साँझा उम्मेदवार वर्षमान पुनलाई लक्षित गरी बम विष्फोट गराईएको थियो । उक्त घटनामा नेत्रविक्रम चन्द विप्लव कार्यकर्ताको हात रहेको आशंका गरिरहेकै बेला सरकारले मन्त्रीमाथि बम प्रहार भएको हो ।