रोल्पामा माओवादी शीर्ष नेता मार्ने प्रयासः ओनसरी घर्ती, कृष्ण महरा लक्षित गरी बम प्रहार

प्रदेश

काठमाडौं, १ मंसिर । रोल्पामा सभामुख ओनसरी घर्ती मगर र माओवादी नेता कृष्णबहादुर महरालाई लक्षित गरी बम प्रहार भएको छ । लिवाङमा वाम गठबन्धनले आयोजना गरेको जनसभालाई सम्बोधन गर्न जाँदै गर्दा लिवाङ र सादोबाटोको बीचमा पर्ने भदौरे जंगलमा घर्ती, महरा लगायत माओवादी नेता चढेको गाडीमा बम प्रहार भएको हो । उनीहरू फरकफरक गाडीमा सवार थिए ।

भदौरे जंगलको भीरबाट नेताहरुको गाडी भन्दा १० मिटर अगाडि बम प्रहार भएको नेताहरुसँगै रहेका उपराष्ट्रपति नन्दबहादुर पुनका प्रेस संयोजक मनोज घर्ती मगरले जानकारी दिए । घटनामा कुनै क्षति नभएको जिल्ला प्रहरी कार्यालय रोल्पाले जनाएको छ ।

उनीहरू सुलिचौरबाट लिवाङका लागि प्रहरी स्कटिङमा लिवाङ जाँदै थिए । बम प्रहार भए लगत्तै प्रहरीले भदौरे भीरमा घेरा हालेर बम प्रहार गर्ने अज्ञात समूहको खोजी गरिरहेको छ ।

सभामुख घर्ती लगायत बर्षमान पुन र महरा कार्यक्रम आयोजना गरिएको लिवाङमा पुगिसकेका छन् । लिवाङ पुगेपछि नेता महराले बम आक्रमण हुनु अराजनीतिक भएको प्रतिक्रिया दिएका छन् । महरा कार्यक्रममा सहभागी हुन दाङबाट रोल्पा आएका हुन भने रोल्पा प्रतिनिधिसभा सदस्यका उम्मेदवार समेत रहेका वर्षमान र सभामुख ओनसरी रोल्पामै थिए ।