आचारसंहिता उल्लंघन गरेको भन्दै देवयानीमाथि पानीको जार प्रहार, स्कर्टिङ गरेर काठमाडौं पठाईयो

प्रदेश

सिन्धुपाल्चोक, ८ मंसिर । मौन अवधिमा चुनावीसभा गरेको भन्दै देवायनी राणाको कार्यक्रममा अवरोध गरिएको छ । राप्रपा प्रजातान्त्रिकका अध्यक्ष पशुपति शमशेर जबराकी छोरी देवयानीले सिन्धुपाल्चोकमा चुनावी कार्यक्रम गरेपछि वामपन्थी गठबन्धनका कार्यकर्ताले अवरोध गरेका हुन् ।

बुबालाई चुनाव जिताउन केही दिनदेखि सिन्धुपाल्चोकमा खटिएकी देवयानीलाई वामपन्थी कार्यकर्ताले आक्रमण प्रयास गरेपछि सुरक्षाकर्मीले स्कर्टिङ गरेर काठमाडौं पठाएका छन् । शुक्रबार विहान चौतारा नगरपालिकाको कल्लेरीस्थित कांग्रेस नेता यज्ञप्रसाद दंगालको घरमा स्थानीय भेला गरेर कोणसभा गरिरहेका बेला वामपन्थी कार्यकर्ताले आपत्ति जनाएका थिए ।

सो क्रममा विवाद हुँदा एकजनाले पानीको जार उठाएर देवयानीमाथि प्रहार गरेका थिए । मौन अवधिमा निर्वाचन आचारसंहिता उल्लंघन गरेको भन्दै एमाले र माओवादीका कार्यकर्ताले बिरोध जनाएका हुन् । पानीको जारले देवयानीलाई लाग्न पाएन । उनलाई तत्कालै लोकतान्त्रिक गठबन्धनका कार्यकर्ताले सो ठाउँबाट भगाएको बताइएको छ ।

देवयानीलाई सशस्त्र प्रहरीले स्कर्टिङ गरि सैनिक क्याम्पमा राखेको थियो । त्यहाँ पनि वामपन्थी कार्यकर्ताले नाराबाजी गरेपछि उनलाई सुरक्षासहित काठमाडौं पठाइएको प्रहरीले जनाएको छ ।

यसैबीच, सिन्धुपाल्चोकको आकाशमा सेनाले हेलिकोप्टरबाट समेत गस्ती गरिरहेको छ । अति संवेदनशील जिल्ला मानिएको सिन्धुपाल्चोकमा चुनाव शान्तिपूर्ण रुपमा गराउन नेपाल प्रहरीका एसएसपी सहित १३ जना डिएसपीको टोली कमाण्डोसहित परिचालन भएको छ ।