झापा पुगेर ओलीले भने, ‘राजाको पाउँमा बिन्ति चढाउनेले अधिनायकवाद आउँछ भन्न सुहाउँदैन्’

प्रदेश

झापा, १४ मंसिर । नेकपा एमालेका अध्यक्ष केपी शर्मा ओलीले कम्युनिष्टले जिते अनिनायकवाद आउँछ भन्ने भ्रम कांग्रेसले फैलाईरहेको आरोप लगाएका छन् । हिजो जसले प्रधानमन्त्रीको अधिकार राजाको पाउमा उढाए, उनीहरुले कम्युनिष्टले जिते अधिनायकवाद आउँछ भन्दै भ्रम फैलाएको ओलीको दाबी छ ।

राप्रपाको पहलमा बिहीबार भद्रपुरमा आयोजित चुनावी सभामा एमाले अध्यक्ष ओलीले भने, ‘हिजो प्रधानमन्त्रीको अधिकार राजाको पाउँमा चढाउँदा अधिनायकबाद आएन्, अहिले कम्युनिष्ट मिलेर चुनाव जित्न खोज्दा अधिनायकबाद आउँछ रे ।’

झापा ५ मा एमालेले म्याच फिक्सिङ गरिरहेको बेला अध्यक्ष ओलीले कसैसँग त्यस्तो नगरिने बताए । एमाले–माओवादीको वाम गठबन्धनले झापा ३ मा राप्रपाका राजेन्द्र लिङ्देनलाई सर्मथन गरेको छ । कांग्रेसका कृष्ण सिटौला चुनावी मैदानमा छन् । तर, झापा ३ मा पछिल्लो पटक सिटौलालाई जिताउन म्याच फिक्सिङ भएको चर्चा चलिरहेको छ ।

ओलीले दुई वटा अंग्रेजी शब्द मिसाएर जनतालाई भ्रममा पार्ने कोसिस भएको बताए । ‘एमाले जे गर्नुछ, त्यही गर्छु भन्छ’ उनले भने, ‘मैदानमा खेलाडी पठाउने तर, म्याच फिक्सिङ गर्ने काम अरु पार्टीले सोच्ला एमालेले सोच्दैन ।’

उनले गठबन्धनकारी दल माओवादी केन्द्रलाई पनि म्याच फिक्सिङ नगर्न आग्रह गरेका छन् । कांग्रेसले धोका दिएपछि झापा ३ मा वाम गठबन्धनले राप्रपालाई समर्थन गरेको भन्दै उनले लिङ्देन साझा उम्मेदवार भएको बताए । एमाले र माओवादीको समर्थन हुँदा हुँदै लिङ्देन पराजित भए एमालेलाई लाज हुने उनले बताए ।