सधै मन्त्री बन्नैपर्ने कमल थापा पराजित, मकवाननपुर १ मा कृष्ण दाहालको ‘ह्याट्रिक’

प्रदेश

मकवानपुर, २४ मंसिर । राप्रपा अध्यक्ष कमल थापा एमाले नेता कृष्णप्रसाद दाहालसँग पराजित भएका छन् । प्रतिनिधिसभा सदस्यको लागि मकवानपुर क्षेत्र नम्बर १ बाट चुनाव लडेका अध्यक्ष थापा दाहालसँग पराजित भएका हुन् । पराजित भएसँगै थापाको राजनीतिक यात्रामा प्रश्नचिन्ह खडा भएको छ । मकवानपुर क्षेत्र नम्बर १ बाट जितेका दाहालले हालका ऊर्जामन्त्री थापाविरुद्ध जितको ह्याट्रिक पुरा गरेका छन् ।

दाहालले ५ हजार ९७३ मतान्तरले थापालाई हराएका हुन् । दाहालले ४० हजार ६३१ मत प्राप्त गर्दा थापाले भने ३४ हजार ६५८ मत मात्रै पाए । निर्वाचन पूर्वसन्ध्यामा ऊर्जामन्त्री रहेका थापाले हेटौंडा बजारबाट राजमार्ग सार्ने निर्णय गराएपछि दाहाललाई थापाविरुद्ध जित निकाल्न असहज हुने अनुमान गरिएको थियो ।

राप्रपाका अध्यक्ष कमल थापालाई पराजित गरेर उनी तेस्रोपटक सांसद बनेका छन् । ०४८ र ०५६ सालको निर्वाचनमा उनी सांसदमा निर्वाचित भएका थिए भने ०५१ सालको मध्यावधि चुनावमा भने दाहाल कमल थापासँग हारेका थिए ।

यसपटक बाम गठबन्धनको साझा उम्मेदवार बनेका दाहालले कांग्रेससँग गठबन्धन गरेका थापालाई पराजित गरेका हुन् । द्द०२० सालमा जन्मिएका दाहाल २०३७ सालको विद्यार्थी आन्दोलनमार्फत राजनीतिमा प्रवेश गरेका हुन् । उनले ०५४ देखि ०६६ सम्म निरन्तर एमाले मकवानपुरको नेतृत्व सम्हालेका थिए ।