पति वियोगमा रहेकी विना मगर कञ्चनपुर १ बाट दोब्बर मतान्तरले विजयी, रचिन यस्तो इतिहास

प्रदेश

कन्चनपुर, २५ मंसिर । पति वियोगमा रहेकी माओवादी नेतृ विना मगरलाई जितको खुसी छाएको छ । प्रतिनिधिसभा सदस्यमा कञ्चनपुर क्षेत्र नम्बर १ मा उम्मेदवारी दिएकी माओवादी केन्द्रका अध्यक्ष प्रचण्डकी बुहारी विना मगरले दोब्बर मतान्तरले विजयी भएकी छन् । विनाले नेपाली कांग्रेसका उम्मेदवार दिवानसिंह विष्टलाई १९ हजार २४८ मत अन्तरले हराएकी हुन् । विनाले ३८ हजार ४६७ र विष्टले १९ हजार २१९ मत पाएका छन् ।

विना आफ्नो क्षेत्रमा चुनाव प्रचारप्रसारमा व्यस्त रहेका बेला श्रीमान प्रकाश दाहालको हृदयाघातबाट काठमाडौंमा निधन भएको थियो । पति वियोगको बेला पनि आफ्नो चुनावी अभियानमा तीब्रता दिँदै आएकी थिईन् । ८८ हजार ५९ मतदाता रहेको कञ्चनपुरको १ नम्बर निर्वाचन क्षेत्रमा ६३ हजार ३ सय १ मत खसेकोमा ६० हजार २ सय ६३ मत सदर भएको थियो ।

दोस्रो संविधानसभाको निर्वाचनमा समेत उमेदवार रहेकी विना मगर कांग्रेसका दिवानसिंह विष्टसँग पराजित भएकी थिईन् । प्रतिनिधिसभा सदस्यमा निर्वाचित भएसँगै विना कञ्चनपुरबाट केन्द्रीय संसदमा प्रत्यक्ष निर्वाचित भएर पुग्ने पहिलो महिला बनेकी छन् । यस पटकको प्रतिनिधिसभा सदस्य निर्वाचनमा सुदूरपश्चिम अर्थात् ७ नम्बर प्रदेशबाट निर्वाचित हुने एक मात्र महिला बन्ने देखिएको छ ।