नयाँ सरकार गठन नभएसम्म ओली र प्रचण्डसँग छलफल नगर्ने प्रधानमन्त्री देउवाको अडान

काठमाडौं, ६ पुस । प्रधानमन्त्री शेरबहादुर देउवाले नयाँ सरकार गठन नहुञ्जेलसम्म अन्य पार्टीका नेताहरुसँग भेटघाट नगर्ने भएका छन् । प्रधानमन्त्री देउवाले एमाले अध्यक्ष केपी ओली र माओवादी केद्रका अध्यक्ष प्रचण्डसँग कुनै प्रकारको छलफल नगर्ने भएका हुन् । देउवाले निर्वाचनसम्बन्धी व्यवस्था गर्न बनेको अध्यादेश’ का बारेमा देखिएको विवादका विषयमा दलीय छलफल नगर्ने भएका हुन् ।

देउवाले अहिलेसम्म अध्यादेशका विषयमा दलका नेताहरूसँग कुनै छलफल नगरेको र आगामी दिनमा पनि नगर्ने प्रधानमन्त्रीको सचिवालयले जनाएको छ । अध्यादेशमा संवैधानिक र कानुनी अड्चन नभएकाले दलीय छलफल आवश्यक नभएको भन्दै प्रधानमन्त्री देउवाले दलीय छलफल नगर्ने बताएका हुन् ।

अध्यादेश राजनीतिक सहमतिका आधारमा निकास निकाल्ने विषय नभएकाले दलीय छलफल आवश्यक नरहेको प्रधानमन्त्रीका स्वकीय सचिव अधिवक्ता केशव जोशीले बताए । मन्त्रिपरिषद् बैठकले पारित गरेर पठाएको लामो समय भइसक्दा पनि अत्यावश्यक अध्यादेश स्वीकृत नगरेको भन्दै राष्ट्रपतिसँग सरकार असन्तुष्ट छ ।

प्रधानमन्त्री देउवाले गत बिहीबार पनि राष्ट्रपति विद्यादेवी भण्डारीलाई भेटेर अध्यादेश स्वीकृत गरेर बाटो खोलिदिन आग्रह गरेका थिए । तर, राष्ट्रपतिले अध्यादेश स्वीकृत नगरेपछि सरकार ‘पर्ख र हेर’को रणनीतिमा छ ।

यो विषयमा देउवाले कुनै पनि दलसँग छलफल नगर्ने अडान राखेका हुन् । यस विषयमा छलफल गर्न ओली र प्रचण्ड राष्ट्रपति निवास गएका थिए । बुधबार भएको छलफलमा राष्ट्रपति भण्डारीले सवै दल मिलेर आउन आग्रह गरेकी थिईन् ।

Comments