चुनावमा हारेर सर्वोच्च पुगेका प्रदीप, दिपक र रामसिंहको रिटमा कारण देखाउ आदेश

काठमाडौं, ७ पुुस । चुनावमा पराजित भएपछि सर्वोच्च अदालत पुगेकाहरुको रिटमा कारण देखाउ आदेश जारी भएको छ । संखुवासभा  प्रतिनिधिसभा सदस्य निर्वाचनमा पराजित भएका दिपक खड्का र तनहुँ क्षेत्र नम्बर २ को प्रदेशसभा (क) का कांग्रेस उम्मेदवार प्रदीप पौडेलले दायर गरेको रिटमा सर्वोच्चले कारण देखाउ आदेश जारी गरेको हो ।

खड्काको रिटमा कारण देखाउ आदेश जारी गर्दै १४ गते दुबै पक्षलाई छलफलमा बोलाएको छ । त्यस्तै पुन मतदान गर्नुपर्ने माग गर्दै पौडेलले दायर गरेको रिटमा सर्वोच्च अदालतले छलफलका लागि १९ गते दुबै पक्षलाई बोलाएको छ ।

प्रधानन्यायाधीश गोपाल पराजुली र न्यायाधीशहरु दीपकराज जोशी, ओमप्रकाश मिश्र, चालेन्द्रशम्शेर जबरा र दीपककुमार कार्कीको संवैधानिक इजलासले कारण देखाउ आदेश जारी गरेको हो । पौडेल वाम गठबन्धनकी उम्मेदवार आशा कोइरालासँग ५ मत अन्तरले पराजित भएका थिए । तर, ४२ मत फर्जी भेटिएको भन्दै पौडेलले पुनः मतदान हुनुपर्ने माग गरेका थिए ।

त्यस्तै प्रतिनिधिसभा निर्वाचन क्षेत्र नम्वर १ मा नेकपा एमालेका उम्मेदवार राजेन्द्रप्रसाद गौतमसँग पराजित भएपछि खड्का उक्त मतपरिणाम उल्ट्याउन माग गर्दै सर्वोच्च पुगेका थिए । एमालेका गौतमले ३२ हजार ७ सय ६९ र कांग्रेसका खड्काले ३१ हजार ६ सय ३९ मत ल्याएका थिए। खड्का ११ सय ३३ मतले पराजित भएका हुन्। खड्काले पुस ५ मा रिट दायर गरेका हुन्।

यसैगरी, धनुषा ३ का वाम गठबन्धनका उम्मेदवार रामसिंह यादवको रिटमा कारण देखाउ आदेश जारी गर्दै १९ गते दुबै पक्षलाई छलफलका लागि बोलाएको छ । मौन समय र निर्वाचनको दिन वाम गठबन्धनले राजपा उम्मेदवार राजेन्द्र महतोलाई समर्थन गरेको भन्ने हल्ला चलाएकाले निर्वाचन परीणाम बदर गर्नुपर्ने उनको माग छ ।

Comments