रेशम चौधरी टीकापुर घटनाको मुख्य योजनाकार नभई पीडित भएको ठहर

प्रदेश

काठमाडौं, ७ पुस । उच्चस्तरीय जाँचबुझ आयोगले कैलालीको टीकापुर घटनाको मुख्य योजनाकार रेशम चौधरी नभएको ठहर गरेको छ । शुक्रबार प्रधानमन्त्री शेरबहादुर देउवालाई बुझाएको प्रतिवेदनमा चौधरी निर्दोश रहेको ठहर गरेको हो । स्थानीय र सरोकारवालासँगको कुराकानीका आधारमा जाँचबुझ आयोगले चौधरी घटनाको पीडित भएको निष्कर्ष निकालेको छ ।

संविधानको प्रावधानप्रति असन्तुष्टि जनाउँदै २०७२ भदौ ७ मा टीकापुरमा घरेलु हतियारसहित थारु समुदायका व्यक्तिले सरकारविरुद्ध प्रदर्शन गरेका थिए । प्रहरीले चौधरीलाई टीकापुरमा ७ प्रहरी र एक बालक हत्या घटनाको प्रमुख योजनाकारका रुपमा मुद्दा दायर गरिसकेको छ ।

हालसम्म फरार रहेका चौधरीले कैलाली क्षेत्र नम्बर १ बाट फराकिलो मतान्तरसहित हालै प्रतिनिधिसभा सदस्यमा निर्वाचित भएका छन् । प्रहरीमाथि आक्रमणको घटना पूर्वयोजना अनुरुप नै भएको तर रेशम चौधरीले नभई अरु कसैले बनाएको प्रतिवेदनमा उल्लेख छ ।

टीकापुर छेउछाउका गाउँबाट स्थानीयलाई मदिरा पिलाएर ल्याइएको र आक्रमण नै गर्न लगाइएको स्थानीयले बताएका आयोगले प्रतिवेदनमा उल्लेख गरेको छ । तर, आन्दोलनमा रेशमको पनि समर्थन रहेको र आफ्ना कार्यकर्तालाई आन्दोलनमा पठाएको प्रतिवेदनमा उल्लेख छ। यद्यपी मुख्य योजनानकार अरु नै भएको आयोगको प्रतिवेदनमा खुल्न आएको छ ।