लालु यादवलाई जेलमै तेस्रो लिंगीबाट सेक्स गर्ने देखि बिहे सम्मको प्रस्ताव

विश्व प्रवास

एजेन्सी, २१ पुस । चारा घोटाला अभियोगमा भारतीय पूर्व केन्द्रीय रेलमन्त्री लालुप्रसाद यादव जेल सजाय भोगिरहेका छन् । अदालतले उनलाई सजाय सुनाउने दिने हिजो बिहीबार अदालतमा निकै रोचक घटनाहरु भएका छन् । न्यायाधीश शिवपाल सिंहसँग कुरा गर्दा लालुले निकै रमाइला रमाइला कुरा गरेपछि अदालतमा हाँसो गुञ्जिइरह्यो ।

सुनुवाइकै क्रममा लालु विशेष न्यायाधीशको नजिकै गए । त्यसपछि लालुले भने ‘हजुर जेलमा तेस्रो लिंगी पनि छन् । म उनीहरुसँग हालखबर सोधिरहन्छु । जब उनीहरुको नजिक जान्छु उनीहरुले विवाहको प्रस्ताव गर्छन् ।’ यो सुन्नासाथ अदालतमा भएका सबै मजाले हाँसे । लालुले जेलमा अन्य २ जना न्यायाधीश पनि कैद सजाय काटिरहेको भन्दै उनीहरुले उच्च श्रेणीको सुविधा दिन आदेश दिन पनि अनुरोध गर्न भ्याए ।

लालुले आफ्ना छोरा तथा बिहारका पूर्व उपमुख्यमन्त्री तेजस्वी यादवसहित आफ्नो पार्टी राष्ट्रिय जनता दलका बरिष्ठ नेता रघुवंश प्रसाद सिंह, कांग्रेसका बरिष्ठ नेता मनिष तिवारी र शिवानन्द तिवारी विरुद्ध अदालतले जारी गरेको अदालतको अवहेलनासम्बन्धी आदेश फिर्ता लिन पनि बिन्ती गरे । लालुले भने ‘हजुर मान्छेहरुले पनि के भन्लान् । सबै राजनीतिज्ञ हुन् । हामीले हजुरको अपमान कहिल्यै गर्ने छैनौं ।’

जवाफमा न्यायाधीश सिंहले २३ जनवरीसम्म पर्खिन भने । अवहेलना मुद्दामा अदालतले सबै आरोपीलाई २३ जनवरीका दिन अदालत उपस्थित हुन आदेश दिएको छ । लालुले न्यायाधीश सिंहलाई आफ्नो दिमाग ‘कूल’ राख्न पनि सुझाव दिए ।

न्यायाधीशले लालुलाई ‘तपाइँका कैयौ शुभचिन्तकले अहिले पनि पटक पटक फोन गरेर हैरान पार्छन् । त्यसलाई बन्द गर्नुस्’ भने । लगत्तै लालुले भने ‘यस्तो त नहुनुपर्ने हजुर । कसले बदमासी गरेको रैछ खोजौंला ।’ लालुले आफू जेलमा शान्तिसँग बस्ने बताए ।