चुनाव हार्नुको दोष कांग्रेसमाथि लगाउँदै राप्रपाले गर्‍यो यस्तो निर्णय

प्रदेश

काठमाडौं, २१ पुस । राष्ट्रिय प्रजातन्त्र पार्टीले गत निर्वाचनमा पराजित हुनुमा कांग्रेसलाई दोषी ठहर्‍याएको छ । चुनावी समिक्षा गर्न गत पुष १९ देखि २१ गतेसम्म बसेको केन्द्रीय कार्यसमिति बैठकले राप्रपा पराजित हुनुमा कांग्रेस दोषी रहेको ठहर गरेको हो ।

उसले चुनावमा कांग्रेससँग गठबन्धन बनाउनुनै पराजयको कारण भएको निश्कर्ष निकालेको छ । बैठकले पार्टी हार्नुमा आठ कारण रहेको निश्कर्ष निकालेको हो । बैठकका निर्णय सार्वजनिक गर्न शुक्रबार आयोजित पत्रकार सम्मेलनमा अध्यक्ष कमल थापाले प्रदेश तथा प्रतिनिधि सभा सदस्य निर्वाचनमा कांग्रेससँग गरेको गठबन्धन नाममात्रै भएको बताए ।

उनले भने, ‘त्यो गठबन्धन नामको मात्र भयो, कामको भएन ।’ त्यस्तै राप्रपाले समानुपातिकमा मत नआउनुमा देशभर आफ्ना उम्मेदवार नभएको ठहर गरेको छ । संविधान संशोधनमा आफैं अस्थिर, चुनावका मुखमा पार्टी विभाजन लगायतका कारण पार्टीले हार व्यहोरेको निश्कर्ष पनि राप्रपाले निकालेको छ ।

चुनावमा राप्रपाको अप्रत्याशित परिणामको कारण र आधारका वारेमा विस्तृत अध्ययन अनुसन्धान गरि भविष्यका लागि सुझाव सहितको प्रतिवेदन तयार गर्न बैठकले डा. बिष्णु भण्डारीको संयोजकत्वमा एक निर्वाचन समिक्षा तथा अध्ययन समिति गठन गरेको छ ।

समितिमा केन्द्रिय सदस्यहरु गोविन्द खनिया, भक्ति सिटौला, चन्द्रेश्वर राय यादव, धन बहादुर बुढा, प्रकाश रिमाल, बिजयलक्ष्मी सिंह र श्याम शाही सदस्य रहेका छन् । बैठकले फागनु अन्तिम साता केन्द्रीय परिषद बैठक वीरगञ्जनमा गर्ने, माघमा जिल्ला भेला गर्ने र फागुन पहिलो साता विद्यार्थीको भेला गर्ने निर्णय गरेको छ ।

यस्ता छन् राप्रपा हारका कारण:
१. बलियो र प्रभावकारी लोकतान्त्रिक गठबन्धन निर्माण हुन नसक्नु,

२. लिखित रुपमा भएको सम्झौता अनुरुप नेपाली कांग्रेसले राप्रपालाई प्रतिनिधिसभा र प्रदेशसभामा सिट नदिनु तथा स्थानीय तहमा ईमान्दारितापूर्ण सहकार्य नहुनु

३. राप्रपाले प्रतिनिधिसभा र प्रदेशसभामा प्रत्यक्ष तर्फ अत्यन्त न्युन स्थानमा मात्र उमेदरवारी दिनु र अधिकांश क्षेत्रहरुमा राप्रपाको प्रत्यक्ष तर्फ उमेदवार नहुनु,

४.संबिधान संशोधनबारे राप्रपाको स्पष्ट अडान र धारणा नरहनु,

५. सरकारमा राप्रपाको सहभागिताका सम्बन्धमा जनतामा रहेको भ्रमको निराकरण हुन नसक्नु तथा कार्यकर्ताहरुमा पार्टी सरकारमा रहेको अनुभूति नहुनु,

६. साधन श्रोतको अभाव रहनु

७. कमजोर संगठनको कारण जनमतलाई भोटमा रुपान्तरण गर्न नसक्नु

८. सिद्धान्त प्रति पार्टी नेतृत्व प्रतिबद्ध नरहेको भ्रम जनतामा पर्नु