एमालेले आज प्रदेश १ र ३ को संसदीय दलको नेता छान्दै, को-को छन् मुख्यमन्त्रीको दौडमा ?

प्रदेश

काठमाडौं, २६ माघ । नेकपा एमालेले आज दुई प्रदेशमा संसदीय दलको नेता छान्न निर्वाचन गर्दैछ । प्रदेश १ र प्रदेश ३ मा एमालेले निर्वाचन गर्न लागेको हो । प्रदेश १ को लागि दुई जना नेताहरु संसदीय दलको नेता बन्ने लाईनमा छन् ।

यसअघि आफ्नो दाबेवारी समेत प्रस्तुत गर्दै आएका जीवन घिमिरे उक्त दौडबाट आउट भएसँगै अब दुई नेताहरु अशोक राई र भीम आचार्यबीच प्रतिस्पर्धा हुनेदेखिएको छ । दुवै नेताहरुले आफ्नो उम्मेदवारी दिईसकेका छन् । संसदीय दलको नेतानै मुख्यमन्त्री बन्ने कानुनी प्रावधान छ । प्रदेश १ मा एमालेको एकल बहुमतसहित ५१ सदस्य छन् । दलको नेता चयन हुन कम्तीमा २६ सदस्य आवश्यक पर्नेछ ।

त्यस्तै प्रदेश ३ को मुख्यमन्त्रीमा दावी गर्दै आएका राजेन्द्र पाण्डे निर्वाचन हुने भएपछि यो दौडबाट बाहिरिएका छन् ।एमालेले प्रदेश नं ३ मा दलको नेता सर्वसम्मत छान्ने प्रयास गरेपनि असफल भएपछि शुक्रबार निर्वाचन हुँदैछ ।

शुक्रबार हुने निर्वाचनका लागि पाण्डेले उम्मेदवारी नै दिएनन । ‘ उहाँ (पाण्डे) को उम्मेदवारी नै परेन, अब अष्टलक्ष्मी शाक्य र डोरमणी पोडेलबीच प्रतिश्पर्धा हुनेछ’ एमाले पोलिटव्युरो सदस्य अरुण नेपालले भने । ललितपुरको च्यासलस्थित तुलसीलाल स्मृति प्रतिष्ठानमा दलको नेताका लागि निर्वाचन हुदैछ । यो प्रदेशमा एमालेका ५८ सांसद छन् । दलको नेता जित्न कम्तिमा ३० जनाको मत आवाश्यक पर्छ ।