प्रदेशसभा ५ मा बजेट छलफल, बजेटमा खल्तीको योजना समेतको चर्चा

अर्थ र बाणिज्य

बुटवल, २ बैशाख। प्रदेशसभा ५ को बैठकमा सरकारले ल्याएको बजेटमाथि छलफल सुरु भएको छ ।

आइतबारको बैठकको सुरुमा कांग्रेस सांसद अष्ठभूजा पाठकले विचार राख्दै प्रदेश ५ को पहिलो बजेटमा किसानका कुरा कम परेको बताउनु भयो । ‘सरकारले निकै साँघुरो बजेट ल्याएको छ, धेरै क्षेत्र छुटेका छन् यसलाई र फराकिलो बनाउनुपर्नेछ’ उनले भने ।

त्यस्तै गरी अर्का सांसद कृष्णध्वज खड्काले बजेट कार्यान्वयनमा सबै जुट्नुपर्ने बताएका छन् । उनले बजेटमा खल्तीका योजना पार्ने प्रचलनलाई बन्द गर्नुपर्ने बताए । ‘योजना बदल्ने र गोजाबाट योजना आउने कामलाई कडाई गरौं’ खड्काले भने ।

सांसद तारा जिसीले प्रस्तुत बजेटले आफुहरुलाई कुहिरोमा अलमलिएको काग जस्तै बनाएको टिप्पणी गरिन् । ‘गाउँपालिकाको बजेट जस्तै छ, सरकारको आगामी बजेट पनि आशालाग्दो नहुने संकेत यसले गरेको छ’ उनले भनिन् ।

जिसीले भनिन् “हामीलाई बजेटले हास्य पात्र बनायो, केन्द्रकै मुख ताक्नुपर्ने भए किन संघीयताको अभ्यास गरेको, संघीयतामा प्रदेशलाई बजेट अभाव भएको छ, यस्तै भए हाम्रो पार्टीले भनेजस्तै गरी ढिलोचाँडो संघीयता खारेज हुनेछ ।”

सांसद दीर्घनारायण पाण्डे बजेटले धेरै कुरा समेट्न नसेकेको बताए । ‘सरकारले हतारमा बजेट ल्याउदाको परिणाम यस्तो भएको हो’ उनले भने ।

प्रदेशसभा बैठकमा आर्थिक मामिला तथा योजना मन्त्रीको समेत कार्यभार सम्हालेका मुख्यमन्त्री शंकर पोखरेलले १ अर्ब २ करोड ५ लाख रुपैयाँको बजेट पेश गरेका थिए ।