सुन काण्डमा फैलिएको एउटा अफवाहः व्यवसायी मल्होत्राको संग्नता देखिन्न !

राजनीति

काठमाडाैं १५, असार । प्रतिष्ठित व्यापारी तथा नेपालस्थित सामसुङ मोबाईलका अधिकृत बिक्रेता दीपक मल्होत्राको चर्चित सुन तस्करी काण्डमा कुनै संलग्नता नरहेको गृह मन्त्रालय उच्च स्रोतले जनाएको छ ।

बिगत केही दिनदेखि व्यवसायी मल्होत्रा साढे ३३ किलो सुन तस्करीकाण्डमा मुछिएको, उनको व्यवसायिक साझेदार भनिएका हुण्डी व्यापारी बिमल पोद्दारलाई उच्चस्तरीय छानविन समितिले प्रक्राउ गरेपछि उनले मल्होत्रालाई पोलेको, त्यसपछि दीपक मल्होत्रा फरार भएको जस्ता अफवाह बजारमा व्यापक फैलिएपछि न्युज-नेपाल डटकमले यसबारेको वास्तविकता बुझ्ने प्रयास गरेको थियो ।

छानविन समिति र गृह मन्त्रालय उच्च स्रोतले हालसम्म व्यवसायी दीपक मल्होत्राको नाम कसैले नपोलेको तथा हाम्रो आफ्नै सुचना संयन्त्रले खोजी एवं मिहीन अनुसन्धान गर्दापनि कँहीकतैबाट पनि उनको संलग्नता पुष्टि हुने काम कारवाही नदेखिएको जानकारी दिएको छ । ठूला माछा समात्ने समितिको प्रयासमा उँहाको नाम पनि जवरजस्त केही संचार माध्यामले जोडेकोले के रहेछ भनि हामीले गहन अनुसन्धान गरेका थियौ तर उँहाको संलग्नता कतैबाट पनि देखिएन : गृह स्रोतले दावी गरेको छ ।

चर्चित हुण्डी व्यवसाही बिमल पोद्दारलाई छानविन समितिले प्रक्राउ गरेपछि केही संचार माध्याममा व्यवसायी मल्होत्राको नाम जोडेर समाचार प्रकाशित भएका थिए । जतिबेला मल्होत्रालाई समितिले प्रक्राउ गर्न लागेकोले उनी फरार भए भनि व्यापक अफ्वाह फैलाईएको थियो त्यतिबेला उनी प्रधानमन्त्री केपी ओलीसँगै चीनको उच्चस्तरीय भ्रमण दलमा समाबेश थिए ।

व्यवसायी मल्होत्रा नेपाल चेम्बर अफ कर्मशको तर्फबाट भ्रमण दलमा सामेल थिए । उनी प्रधानमन्त्री ओलीसँगै नेपाल फर्किसकेका छन् । उनी चेम्बरको उपाध्यक्ष पनि हुन । कुनै समय उनको नाम सुन र भारु तस्करीमा जोडिएपनि बिगत १५ बर्षदेखि मल्होत्रा मोबाईल ,घरजग्गा तथा कोरियन गाडी साङयोङको व्यापारमा संलग्न रहदै आएका छन् ।

यता गृह मन्त्रालयका सह–सचिव ईश्वरराज पौडेल नेतृत्वको उच्चस्तरीय छानविन समितिले ३८ सय क्विन्टल सुन तस्करी र मोरङका सनम शाक्य हत्या प्रकरणको छानबिन अन्तिम चरणमा पुर्याएको छ । चैत २० गते बसेको मन्त्रिपरिषद बैठकको निर्णयानुसार गठन भएको समितिले असार मसान्तसम्म सरकारलाई अन्तिम प्रतिवेदन बुझाउने गरी अनुसन्धान प्रक्रियालाई निष्कर्षतर्फ पुर्याउन लागेको बताएको छ ।

गत माघ ९ गते त्रिभुवन अन्तर्रा्ष्ट्रिय विमानस्थलबाट भित्रर्याएर बेपत्ता पारिएको भनिएको तस्करीको साढे ३३ किलो सुनका भरिया भनिएका मोरङका सनम शाक्यको हत्या भएपछि सरकारले सुन तस्करी र सनमको हत्याबारे छानबिन गर्न समिति गठन गरेको थियो ।

समिति गठन भएपछि प्रहरीका बहालबाला उच्च अधिकारीसहित व्यवसायी गरी सुन तस्करी र सनम शाक्य हत्या प्रकरणमा संलग्न भनिएका ६३ जनाविरुद्ध जिल्ला अदालत मोरङमा मुद्दा दर्ता भएको छ । मोरङ जिल्ला अदालतको थुनछेक बहसपछि सुन तस्करी र सनम हत्या प्रकरणका मुख्य अभियुक्त चूडामणि उप्रेती गोरेसहित ३१ जना प्रतिवादी मुद्दाको पुर्पक्षका लागि थुनामा छन् भने मुद्दा दर्ता भएकामध्ये ३० जना प्रतिवादी अझै फरार छन् ।