राजनीतिक भुमरिमा पिल्सियो नेप्से

काठमाडौं ४,साउन । नेपाल स्टक एक्सचेन्ज(नेप्से)को प्रमुख कार्यकारी अधिकृतमा नियुक्त भएको एक वर्ष पूरा नहुँदै सरकारले बर्खास्त गरेपछि अदालत पुगेका चन्द्रसिंह साउद पुनः बहाली भएका छन् ।

अदालतबाट पुनर्बहाली आदेश पाएका चन्द्रसिंह साउद नेप्से पुग्दा नेप्से अध्यक्षले हाजिर गर्न हतार नगर्न भनेपछि फर्केका थिए । “बुधबार अध्यक्षले अर्थ मन्त्रालयमा छलफल गरेर निर्णय गर्ने भनेपछि फर्केको थिए,” साउदले भने, “बिहीबारदेखि नियमित जान्छु ।” सरकारले साउदलाई बर्खास्त गरेपछि अर्थ मन्त्रालयका उपसचिव रमेश अर्यालले अर्को निर्णय नहुँदासम्मका लागि प्रमुख कार्यकारीको जिम्म सम्हालेका थिए । साउदले अदालतको आदेशअनुसार बिहीबारदेखि कामममा जाने बताए ।

उता नेप्सेमा अनलाइन प्रणाली इन्टिग्रेट गर्ने क्रममा प्राविधिक समस्यासमेत आएपछि बिहीबार सेयर कारोबार केही बाधा पुग्यो । नेप्से प्रमुखको लफडा तथा सिस्टमको समस्याका कारण सेयर लगानीकर्ता समेत अन्योलमा देखिए । बुधबार नेप्सेको बेवसाइटमा समेत समस्या आएको थियो । यसले गर्दा लगानीकर्ता सेयर बजारको प्रत्यक्ष सूचना लिएर कारोबार गर्नबाट बञ्चित भए
।
बुधबार नेप्से परिसूचक साढे ५ अंकले घटेको छ । कारोबार सुरु भएदेखि निरन्तर घटेको नेप्से परिसूचक बन्द हुँदासम्म कायम रह्यो । कारोबार सुरु हुँदा १२ सयभन्दा माथि रहेको नेप्से ५.५४ अंकले घटेर ११९८.७७ अंकमा झरेको छ । नेप्से संगै ‘क’ वर्गका कम्पनीको सेन्सेटिभ इन्डेक्स पनि सामान्य अंकले घटेको छ ।
बुधबार नेप्सेमा कारोबार भएका समूहगत परिसूचकमध्ये बैंकिङ २.४७, व्यापार २.७९, विकास बैंक ९.७२, जलविद्युत् १४.४१, निर्जीवन बिमा ६१.६१, उत्पादनमूलक २.०४, अन्य १.३८, लघुवित्त १५.९२ र जीवन बिमा कम्पनी ६७.६५ अंकले घटेको छ । तर, वित्त समूह ०.६७ अंकले बढेको छ ।
नेप्से परिसूचकसँगै कारोबार रकममा पनि कमी आएको छ । बुधबार नेप्सेमा १३९ कम्पनीको २ हजार ३०५ कारोबारबाट १७ करोड ५३ लाख रुपैयाँबराबरको ४ लाख ७७ हजार ६ सय ८७ कित्ता सेयर खरिद बिक्री भयो ।

Comments