सरकारको घुँडा टेकाए सिन्डिकेटधारीले, दसैंको टिकट बुकिङमा अड्को थापेपछि,समितिका बैंक खाता खोलिँदै

अर्थ र बाणिज्य

काठमाडाैँ २९,भदाै । दसैंको मुखैमा यातायात व्यवसायीले अग्रिम बुकिङका लागि रोक्का राखिएका समितिका बैंक खाता खोल्नुपर्ने सर्त अघि सारेका छन् । रोक्का खाता सञ्चालन हुनुपर्ने माग राखेपछि सिन्डिकेट तोड्न बन्द गरिएका खाता फुकुवा गर्न सरकार तयार भएको छ ।

प्रधानमन्त्री केपी शर्मा ओलीले यातायात व्यवस्था विभागका महानिर्देशक लावण्यप्रसाद ढकाललाई निर्देशन दिएपछि यातायातसँग सम्बद्ध समितिका बैंक खाता खुल्ने भएका हुन् ।
लामो समयदेखि यातायात क्षेत्रमा रहेको सिन्डिकेटको अन्त्य गर्दै त्यस क्षेत्रका सबै समितिका बैंक खाता रोक्का गरेको सरकारले दसैंलाई मध्यनजर गर्दै रोक्का भएका बैंक खाता खोल्ने तयारी गरेको हो ।
बैंक खाता खुला गर्न यातायात समितिहरू कम्पनीका नाममा दर्ता हुनुपर्छ । ती समिति कम्पनीमा दर्ता भएपछि समितिका सम्पूर्ण चलअचल सम्पत्ति तथा बैंक खाता कम्पनीका नाममा रुपान्तरण हुन्छन् ।
त्यस्ता कम्पनीका मात्रै बैंक खाता खुल्ने विभागले जनाएको छ । तर, व्यवसायीले भने समितिका नाममा खाता पनि खोल्नुपर्ने सर्त अघि सारिरहेका छन् ।

विभागका अनुसार यातायात क्षेत्रको सिन्डिकेट खारेज भएयता ३ सयको हाराहारीमा समितिहरू कम्पनीमा दर्ता छन् । तिनै कम्पनीमा दर्ता भएका समितिको बैंक खाता खुला हुने प्रक्रिया अघि बढाइएको प्रवक्ता उपाध्यायले राजधानीलाई बताए । त्यस्तै, सिन्डिकेट खारेज भएयता साढे ११ सयको हाराहारीमा नयाँ यातायात कम्पनी दर्ता भएका छन् ।
व्यवसायीले दसैं टिकट बुकिङ खोल्न बैंक खाता खोल्नुपर्ने, यात्रुलाई दिइने बिमा रकममा पुनर्विचार गर्नुपर्ने, वैज्ञानिक भाडादर लागू गर्नुपर्ने लगायतका माग अघि सारेका छन् । व्यवसायीले ती मागमा सबैभन्दा पहिले समितिका नाममा रहेका बैंक खाता खोल्नुपर्ने अडान राखेका छन् । यातायात व्यवसायी र सरकारबीच भएको पटकपटकको छलफलमा व्यवसायीले समितिका बैंक खाता नखोलेसम्म दसैं टिकट खुला नगर्ने अडान लिएपछि सरकार बैंक खाता खोल्न बाध्य भएको हो ।
प्रधानमन्त्री ओलीको निर्देशनलगत्तै यातायात विभागले खाता खोल्ने प्रक्रिया अघि बढाएको छ । विभागका प्रवक्ता गोकर्णप्रसाद उपाध्यायले भने, ‘बैंक खाता खोल्ने विषयमा छलफल भइरहेको छ ।’
सरकारले गत १८ चैतमा यातायात क्षेत्रमा रहेको सिन्डिकेटको अन्त्य गर्दै यातायातसँग सम्बद्ध सबै समितिका नाममा भएका बैंक खाता बन्द गर्ने निर्णय गरेको थियो । दसैंको मुखैमा आएर व्यवसायीले लगातार बार्गेनिङ गरेपछि सरकारले व्यवसायीका बैंक खाता खोल्ने भएको हो ।

प्रधानमन्त्री ओलीले ‘समितिका नाममा रहेका बैंक खाताको रकम कम्पनीमा परिणत भएपछि स्वतः सोही कम्पनीमा जानेगरी प्रक्रिया मिलाउनुस्’ भनेका थिए । दसंैतिहारजस्ता ठूला चाड पर्वमा आगमन सहज बनाउन सार्वजनिक गाडीको अभाव नहोस भन्ने प्रधानमन्त्री ओलीको निर्देशन थियो ।
यातायात व्यवसायीले २०६९ सालदेखि वैज्ञानिक भाडादर कायम गर्न सरकारसँग लगातार छलफल गरिरहेका छन् । साथै, बिमालगायतका अन्य विषयमा पनि सरकारसँग सहमति हुन सकेको छैन । अर्कातर्फ बैंक खाता रोकिएकाले टिकटको बुकिङ खुलाउन पनि समस्या परेको यातायात व्यवसायीको भनाइ छ । यातायात व्यवसायी राष्ट्रिय महासंघका महासचिव सरोज सिटौलाले बैंक खातालगायत वैज्ञानिक भाडा लागू हुनुपर्ने बताए ।

समितिका बैंक खाता रोक्का भएकाले आफ्ना कर्मचारीलाई तलबभत्ता दिन नपाएको, आफूहरूसँग भएको पैसा बैंकमै थन्किएकाले दैनिकी चल्न समस्या भएको तथा सार्वजनिक सवारीसाधन सञ्चालन गर्न अन्य खर्चको समस्या भएकाले अग्रिम टिकट बुकिङ खुलाउन समस्या परेको विभागको भनाइ छ । व्यवसायीका अधिकांश मागका विषयमा सहमति हुन नसकेकाले टिकक बुकिङमा समस्या परेको हो । आगामी आइतबार हुने व्यवसायी र सरकारबीचको छलफलले टिकट बुकिङलगायतका विभिन्न विषयमा टुंगो लगाउने प्रवक्ता उपाध्यायले बताए ।