फिफा वर्ष खेलाडी अवार्ड घोषणा आज, कसले मार्ला बाजी ?

खेलकुद

एजेन्सी । विश्व फुटबल महासंघ (फिफा) ले प्रदान गर्ने बेष्ट प्लेयर अफ द इयर अवार्ड सोमबार (आज) लण्डनमा घोषणा गरिँदैछ । फिफाले वितरण गर्ने अवार्डको अन्तिम सूचीमा क्रिष्टियानो रोनाल्डो, लुका मोड्रिक र मोहमद सलाह रहेका छन् ।

उनीहरु मनोनयमा पर्दा लियोनल मेस्सी भने उत्कृष्ट वर्ष खेलाडीको अन्तिम तीनमा अटाएनन् । फिफाले सन् २०१८ को उत्कृष्ट पुरुष—महिला खेलाडी, पुरुष—महिला प्रशिक्षक, फ्यान, गोलकिपर, फेयर प्ले अवार्ड लगायत अवार्ड सार्वजनिक गर्दैछ ।

त्यस्तै, पुरुषतर्फ मनोनयनमा परेका खेलाडीमध्ये अन्तिम तीनमा पोर्चुगिज स्टार क्रिष्टियानो रोनाल्डा, इजिप्टका फरवार्ड मोहमद सलाह र क्रोएसियाका कप्तान लुका मोड्रिक रहेका छन् । सन् २००६ पछि पहिलो पटक अर्जेन्टिनी कप्तान लियोनल मेस्सी फिफा वर्ष खेलाडीको अन्तिम ३ भित्र पर्न सकेका छैनन् भने मनोनयनको अन्तिम ३ मा पर्न सफल क्रिष्टियानो रोनाल्डो पनि अर्डरमा पहिलो र दोस्रो रोजाइमा पर्न नसकेको सन् २०१० पछि पहिलोपटक हो ।

मनोनित खेलाडी छनोटका लागि २५ प्रतिशत राष्ट्रिय टोलीको प्रशिक्षकबाट, २५ प्रतिशत राष्ट्रिय टोलीको कप्तानबाट, २५ प्रतिशत सेलेक्टिभ मिडियाका प्रतिनिधिबाट र २५ प्रतिशत अनलाइन भोटिङको आधारमा मूल्याङ्कन हुनेछ ।

क्रिष्टियानो रोनाल्डो–पोर्चुगल, रियल मड्रिड र युभेन्टस
विश्वचर्चित खेलाडी क्रिष्टियानो रोनाल्डो फिफा प्लेयर अफ दि अवार्डको शीर्ष ३ मा परेका छन् । ३३ वर्षीया रोनाल्डोले यसअघिका दुवै फिफा उत्कृष्ट वर्ष खेलाडीको ट्रफी जितेका थिए ।
गएको सिजनमा रियल मड्रिडलाई च्याम्पियन्स लिगको उपाधि जिताउन महत्वपूर्ण भूमिका निभाएका रोनाल्डोले उत्कृष्ट प्रदर्शन गरेका थिए । रोनाल्डो च्याम्पियन्स लिगको सर्वाधिक गोलकर्ता समेत हुन् ।

त्यस्तै, रोनाल्डोले जुलाईमा सम्पन्न विश्वकप फुटबलमा पोर्चुगललाई अन्तिम १६ सम्म पुर्याउन सफल भएका थिए भने समूह चरणको पहिलो खेलमा स्पेनविरुद्ध ह्याट्रिक गरेका थिए ।

लुका मोड्रिक– रियल मड्रिड, क्रोएसिया
क्रोएसियाका कप्तान तथा रियल मड्रिडका मिडफिल्डर लुका मोड्रिक यो वर्षको फिफा वर्ष खेलाडी पुरुषतर्फ मनोनित भएका छन् । लुका मोड्रिक आफ्नै पूर्व सहकर्मी क्रिष्टियानो रोनाल्डोसँग प्रतिस्पर्धामा रहेका छन् ।

लुका मोड्रिकले गएको वर्षको च्याम्पियन्स लिगमा रियल मड्रिडका लागि उत्कृष्ट प्रदर्शन गर्दै टिमलाई जिताउन महत्वपूर्ण भूमिका खेलेका थिए । त्यस्तै, मोड्रिकले रसियामा सम्पन्न विश्वकप फुटबलमा क्रोएसियालाई फाइनलसम्म पुर्याउन सफल भएका थिए । क्रोएसिया फाइनलमा फ्रान्ससँग पराजित भएपनि मोड्रिकले बेष्ट प्लेअरको अवार्ड जितेका थिए ।

मोहमद सलाह— लिभरपुल, इजिप्ट
यो वर्षको बेष्ट प्लेयर अफ द इयर जित्ने सम्भावना बलियो रहेका अर्का खेलाडी हुन् मोहमद सलाह । सलाहले च्याम्पियन्स लिगको अघिल्लो सिजनमा लिभरपुललाई फाइनलमा पुर्याउन महत्वपूर्ण योगदान गरेका थिए ।

जुन २०१७ मा रोमाबाट लिभरपुल पुगेका सलाहले ५२ खेलमा ४४ गोल गरेका छन् । त्यस्तै, लिभरपुलले प्रिमियर लिग जित्दा सलाहले गोल्डेन बुटसमेत जितेका थिए ।
सन् १९९० पछि पहिलो पटक इजिप्टलाई विश्वकपमा पुर्याउन सलाहले महत्वपूर्ण भूमिका रोल खेलेका थिए । रसियामा सम्पन्न विश्वकपमा चोटका कारण राम्रोसँग फिट नभएका सलाहले दुई गोल गरे ।

मनोनयनमा परेका खेलाडी र प्रशिक्षक
फिफा वर्ष पुरुष खेलाडी– क्रिस्टियानो रोनाल्डो, लुका मोड्रिक, मोहमद सलाह
फिफा वर्ष महिला खेलाडी– मार्टा, अदा हेजेरबर्ग, डीज्नीफर मारोजसान
फिफा वर्ष पुरुष प्रशिक्षक– डीडीएर डेसच्याम्प, लाट्को डालिस, जिनेदान जिदान
फिफा वर्ष महिला प्रशिक्षक– रेनाल्ड पेड्रोस, आसाको ताकाकुरा, सरिना विगम्यान