कहाँ पुग्यो कर्मचारी समायोजन ? अहिलेसम्म कति कर्मचारीहरुको समायोजन भयो (विस्तृतमा)

समाचार

काठमाडौं ।

फागुन ३ गतेसम्म कर्मचारीहरुको समायोजन सक्ने बताएको सरकारले सोमबारसम्म ७ हजार कर्मचारीहरुको समायोजन गरेको छ । संघिय मामिला तथा सामान्य प्रशासन मन्त्रालय अन्तर्गतको कर्मचारी समायोजन महाशाखाका अनुसार सोमबारसम्म ७ हजार ३ सय ४१ कर्मचारीहरुको समायोजन सकिएको छ । जसमध्ये अधिकांशको समायोजन संघमा भएको छ ।

समायोजन सकिएका कर्मचारीहरुमध्ये संघमा ५ हजार ६ सय ९१ छ । प्रदेशमा ९ सय ७ जनाको र स्थानीय तहमा ७ सय ४३ जना कर्मचारी समायोजन भएका छन् ।

अहिले अधिकृततर्फ प्रशासन, लेखा र राजश्व समूहको समायोजन सकिएको छ । अब अधिकृतका अन्य समूहसँगै लेखापाल, सहलेखापाल, नायब सुब्बा र खरदारको समायोजनको काम पनि सुरु गर्ने तयारी रहेको कर्मचारी समायोजन महाशाखाले जनाएको छ ।

५७ सचिव सबैको संघमा समायोजन गरिएको छ । ६ सय ७६ सहसचिवमध्ये संघमा ५ सय ७४ र प्रदेशमा १ सय २ जना समायोजन भएका छन् । स्थानीय तहमा भने सहसचिवको दरबन्दी छैन ।

२ हजार ६ जना उपसचिव समायोजन भएकामध्ये संघमा १ हजार ५ सय ३१, प्रदेशमा २ सय ३७ र स्थानीय तहमा २३८ जना समायोजन भएका छन् ।

यसैगरी अधिकृततर्फ प्रशासन समूहका २ हजार ३ सय ४१ जना संघमा, ३ सय ७१ जना प्रदेशमा र १ सय ७८ जना स्थानीय तहमा समायोजन भएका छन् ।

यस्तै, लेखा समूहका ६ सय १० जना अधिकृत संघमा समायोजन भएका छन् । लेखा समूहका अधिकृत प्रदेशमाभन्दा धेरै स्थानीय तहमा समायोजन भएका छन् । स्थानीय तहमा ३ सय २७ र प्रदेशमा १ सय ९५ जना लेखा अधिकृतलाई समायोजन गरिएको छ ।

राजश्वतर्फ ५ सय ८० अधिकृतमध्ये प्रदेशमा २ जना मात्र समायोजन भएका छन् । बाँकी सबै ५ सय ७८ जना लेखा अधिकृत संघमै छन् ।