एकाएक सेनाले किन निकाल्यो यस्तो विज्ञप्ती (हेर्नुहोस् विज्ञप्तीसहित)

समाचार

काठमाडौं ।

विप्लव समूहमाथि सरकारले प्रतिवन्ध लगाएसँगै नेपाली सेना परिचालन गरिएको समाचारहरु सार्वजनिक भएपछि नेपाली सेनाले प्रष्टिकरण दिएको छ ।

विभिन्न सञ्चारमाध्यमहरुमा कालिकोट लगायतका जिल्लामा सेना गाउँ पस्यो जस्ता समाचार आएपछि सेनाले एक विज्ञप्ती जारी गर्दै आफ्नो आधिकारिक धारणा सार्वजनिक गरेको हो ।

सेनाले आफ्नो विषयमा भएका समाचारहरु भ्रामक भएको भन्दै ध्यानाकर्षण भएको जनाएको छ । सेनाले जारी गरिएको विज्ञप्तीमा भनिएको छ, ‘नेपाली सेना अहिले पूर्वनिर्धारित तालिम, सैन्य अभ्यास र स्वास्थ्य शिविरमा केन्द्रित रहेको छ ।

वर्तमान अवस्थामा नेपाली सेना आफ्नो पूर्वनिर्धारित तालिम, सैनिक अभ्यास तथा स्वास्थ्य शिविरलगायतका नियमित कार्यहरुमा केन्द्रित भएको हुँदा यस्ता समाचारहरुबाट भ्रममा नपर्न नेपाली सेना आग्रह गर्दछ ।’

विज्ञप्तीमा अगाडी भनिएको छ, ‘नेपाली सेना नेपालको संविधान, सैनिक ऐन र नेपाल सरकारको नीति तथा निर्देशन अनुसार सञ्चालन हुने संस्था भएकोले नेपाली सेना आफ्नो जिम्मेवारी प्रति सजग छ । सोही आधारभूत मान्यतामा नेपाली सेना सदैव अडिग रहेको समेत स्मरण गराउँदछौँ ।’

विगत केही दिनदेखि आधिकारिक श्रोतले दिएको औपचारिक सूचनाबाहेक पनि विभिन्न सैनिक स्रोतको हवाला दिँदै केही सञ्चार माध्यमहरुले नेपाली सेनासम्बन्धी गरेका विभिन्न भ्रामक र कपोलकल्पित टिकाटिप्पणीहरु गरेको भन्दै विज्ञप्तिमा गुनासो गरिएको छ ।