मेसीका लागि बार्सिलोनाको ढोका सँधै खुला रहनेछ : जाभी

खेलकुद

- न्युज नेपाल

काठमाडौं । बार्सिलोनाका मुख्य प्रशिक्षक जाभी हर्नान्डेजले आफु प्रशिक्षक रहुनजेल लियोनेल मेसीलाई सँधैं बार्सिलोनामा स्वागत गर्ने प्रतिक्रिया दिएका छन् ।

जाभीले आइतबार आयोजित एल क्लासिकोको प्रेस कन्फरेन्समा भने, ‘मेसीका लागि बार्सिलोनाको ढोका सँधै खुला रहन्छ यो उनले कमाएको हो।’

‘ म यहाँ प्रशिक्षक रहुनजेल उनी जहिले चाहे पनि आउन सक्छन् । ट्रेनिङ हेर्न होस् या प्रशिक्षकसँग कुरा गर्न । उनले हामीमाथि गरेको योगदान अमूल्य छ । उनी इतिहासकै उत्कृष्ट खेलाडी हुन्, उनले थपे ।

‘मेसी क्लबबाट ठूलो सम्मान पाउनका लागि योग्य छन् । तर, उनको अहिले पेरिस सेन्ट जर्मन (पीएसजी)सँग सम्झौता छ । मलाई लाग्छ उनले दुई वर्षका लागि सम्झौता गरेका हुन्,’जाभीले भने ।

मेसीले गतवर्ष नयाँ सम्झौता गर्न असफल भएपछि बार्सिलोना छोडेका थिए । उनी फ्रि–एजेन्टको रुपमा पीएसजीसँग आबद्ध भएका थिए ।

पीएसजीले लिग वान जित्ने पाक्कानै छ । तर, च्याम्पियन्सलिगमा भने अन्तीम १६ बाट नै बाहिरिसकेको छ । मेसीले चोटका कारण मोनाकोसँगको खेल गुमाउनेछन् । उनले पीएसजीका लागि खेलेका सबै खेलहरुबाट कुल सात गोल गरेका छन् ।