नेकपा एसका मन्त्रीहरुले पद जोगाउन प्रम देउवालाई भनेः निर्वाचन घोषणा गराैं

गतिविधि

- न्युज नेपाल

काठमाडाैं । नेकपा एकीकृत समाजवादी पार्टीबाट सरकारमा सहभागी मन्त्रीहरुले निर्वाचनको घोषणा गरेर आफ्नो पद सुरक्षित गर्न प्रधानमन्त्री शेरबहादुर देउवालाई सुझाएका छन् ।

सचिवालय बैठकबाट नेकपा एसले मन्त्री फिर्ता बोलाउने र नयाँलाई अवसर दिने भन्दै नामावली बुझाएपछि आफ्नो पद जोगाउन मन्त्रीहरु निर्वाचनको घोषणा गरिदिन आग्रह गर्ने स्थानमा पुगेका हुन् ।

‘अहिले बजेटका कारण रोकिएको छ । अब प्रधानमन्त्रीको अमेरिका भ्रमण लगत्तै निर्वाचन घोषणा गरिदिए मन्त्री हेरफेर गर्न पाइदैन् । त्यसपछि पद सुरक्षित बन्ने र काम गर्न सहज हुन्छ भन्ने हिसाबले प्रधानमन्त्री कहाँ यस्तो प्रस्ताव आएको छ’, बालुवाटार स्रोतले भन्यो ।

मन्त्री हेरफेर गर्ने विषयले सरकार नै अल्पमतमा पर्ने र गठबन्धनको भविष्य नै संकटमा पर्ने भन्दै प्रधानमन्त्री देउवा र नेकपा माओवादी केन्द्रका अध्यक्ष प्रचण्डले नेकपा एसका अध्यक्ष माध नेपाललाई अहिलेलाई मन्त्री हेरफेर नगर्न मनाएका थिए । तर, उनको पार्टीमा यहि विषयका कारण विवाद चर्किदै गएको छ । सोहि पार्टीका सम्मानित नेता झलनाथ खनालले पार्टीको निर्णय नै सर्वोपरि हुने भएकाले मन्त्री परिवर्तन अनिवार्य भएको दाबी गर्दै आएका छन् ।

पर्यटनमन्त्री प्रेमबहादुर आले, स्वास्थ्य मन्त्री विरोध खतिवडा, सहरी विकासमन्त्री रामकुमारी झाँक्री र श्रममन्त्री कृष्णकुमार श्रेष्ठले यस्तो सुझाव दिएको स्रोतको दाबी छ । भने, माओवादी केन्द्र, कांग्रेस र जनता समाजवादीकै मन्त्रीहरु पनि सोहि अनुसार गर्नुपर्नेमा जोड दिन थालेका छन् । अहिले गठबन्धन पार्टीमा मन्त्री हेरफेरका लागि चर्को दबाब पर्न थालेको जनाइन्छ ।