महाअभियोग प्रस्ताव स्वतः निष्क्रिय भइसक्यो, संसदको सम्मानका लागि मात्र आएको हुँः जबरा

गतिविधि

- न्युज नेपाल

काठमाडाैं । निलम्बित प्रधानन्यायधीश चोलेन्द्र शमशेर जबराले आफूविरुद्धको महाअभियोग प्रस्ताव स्वतः निष्क्रिय भइसकेको बयान दिएका छन् ।

बयानका लागि सिंहदरबार पुगेका जबराले न्यायपालिकाको गरिमा र यसको विश्वासलाई घटाउने गरेर आफूविरुद्ध महाअभियोग प्रस्ताव आएको भन्दै यसको खण्डण समेत गरेका छन् । बुधबार बयानका लागि महाअभियोग सिफारिस समितिमा गएका उनले आफू संसदको सम्मानका लागि मात्र आएको बताए ।

उनले संसदले नै आफ्नो नियमावलीको पालना गर्न नसकेको टिप्पणी गरे । म पछाडिको व्यक्तिलाई प्रधानन्यायाधीश बनाउन खोजिएको भन्दै उनले त्यसैका लागि आफूविरुद्ध महाअभियोग प्रस्ताव दर्ता गरिएको बताए ।

बुधबार महाभियोग सिफारिस समितिमा जबराले आफूविरुद्धको महाभियोग प्रस्ताव निष्क्रिय भइसकेको बताएका हुन् । ‘महाभियोग प्रस्ताव निष्क्रिय भइसकेको छ । म संसद्को सम्मानका लागि नागरिकका हिसाबले आएको हुँ । यो प्रस्ताव संविधान र नियमावली संसद्ले पारित गरेन,’ उनले भने, ‘मैले यहाँबाट न्याय पाउनुपर्छ ।’

अदालतमा गुटबन्दी हुनुको कारण आफूपछिका न्यायाधीश दीपक कार्कीलाई प्रधानन्यायाधीश बनाउने महत्त्वाकांक्षा रहेको जबराको भनाइ छ । कार्कीलाई प्रधानन्यायाधीश बनाउनुपर्ने प्रस्ताव आफूकहाँ आएको र त्यसलाई अस्वीकार गरेको जबराको भनाइ थियो । त्यसरी न्यायपालिका चल्दैन भनेर अस्वीकार गरेको जबराले बयानमा भनेका थिए । ‘मैले यसरी न्यायपालिका चल्दैन भनेर अस्वीकार गरेको हो,’ उनले भने ।