मेस्सीलाई पछि पार्दै हालान्डले जिते यूईएफए पुरुष वर्ष खेलाडीको उपाधि

खेलकुद

- न्युज नेपाल

काठमाडौं । अर्जेन्टिनाका लियोनल मेस्सीलाई पछि पार्दै म्यानचेस्टर सिटीका एर्लिङ हालान्डले यूईएफए पुरुष वर्ष खेलाडी सन् २०२३ को उपाधि जितेका छन् ।

मोनाकोमा भएको एक समारोहकाबीच उनलाई यो उपाधि प्रदान गरिएको छ । यूईएफए पुरुष वर्ष खेलाडीको अन्तिम मनोनयनमा मेस्सी, हालान्ड र केभिन डी ब्रुइन रहेका थिए । गएको सिजन सिटी पुगेका हालान्डले पहिलो सिजनमै प्रिमियर लिग, एफए कप र च्याम्पियन्स लिगसहित तीन उपाधि जिताएका थिए । उनले गएको सिजनमा क्लब र देशका लागि ६२ खेलमा ६० गोल गरेका थिए ।

यस्तै, महिलातर्फ बार्सिलोना र स्पेनकी आइटाना बोनमाटीले वर्ष उत्कृष्ट खेलाडीको अवार्ड जितेकी छिन् । स्पेनले महिला विश्व कपको उपाधि जितेको थियो । म्यानचेस्टर सिटीका स्पेनिस प्रशिक्षक पेप गार्डीओलाले उत्कृष्ट पुरुष वर्ष प्रशिक्षकको अवार्ड जिते । उत्कृष्ट महिला प्रशिक्षक इङ्ग्ल्यान्डकी सरिना विगमन बनिन्। उनकै प्रशिक्षणमा इङ्ग्ल्यान्ड महिला विश्व कपको फाइनल पुगेको थियो ।