बायाँ हाते स्पिनर ललित नारायण राजवंशीले एसियन गेम्स गुमाउने

खेलकुद

- न्युज नेपाल

काठमाडौं । नेपाली राष्ट्रिय क्रिकेट टिमका खेलाडी ललित नारायण राजवंशीले एसियन गेम्स गुमाउने भएका छन् ।

बायाँ हाते स्पिनर ललितको आज बी एण्ड बी अस्पतालमा शल्यक्रिया गरीएको छ । अभ्यास खेलमा फिल्डङका क्रममा घाइते भएका उनको दाँयाँ क्लाभिकल फ्राक्चर (कलर बोन )को आज शल्यक्रिया गरिएको डा.अभिषेकराज सिंहले बताएका छन् । उनले भने, ‘उहाँको अप्रेसन भर्खरै सम्पन्न भएको हो । अहिले अवस्था सामान्य नै छ ।’

ललितले कम्तिमा पनि ४ हप्ता आराम गर्नुपर्ने चिकित्सकहरुले बताएका छन् । ‘हामीले उहाँलाई विश्वकप क्वालिफायर्समा खेलमा फर्काउने लक्ष्य सहित विशेष रिकोभरीको व्यवस्था गर्नेछौं । हेरौं उहाँको शरीरले कतिको छिटो रिकोभर गर्न सक्छ’, डाक्टर भने ।

ललितको बलिङ आर्म सुरक्षित भएका कारण दायाँ पट्टी लागेको चोट रिकोभर गरि उनलाई मैदान फर्काउन डाक्टरहरुको विशेष प्रयास हुने उनले जानकारी दिएका हुन् ।

ललित घाइते भए पछि उनको स्थानमा कसलाई प्रतिस्थापन गर्ने भन्ने निर्णय गरिनसकेको क्यानका कार्यवहाक सचिव दुर्गाराज पाठकले जानकारी दिए । ‘म्यानेजमेन्ट टिमले केही छलफल गर्दै छ । निष्कर्ष निस्किएपछि हामी निर्णय गरेर जानकारी दिन्छौं’, उनले भने ।

हालसम्म ललितले २३ ओडीआईमा २८ र १२ टि–२० आईमा १० विकेट लिएका छन् ।