बुबाबाटै छोरी बलात्कृत, छोराले थाहा पाएर प्रहरीमा जाहेरी दिएपछि बञ्चरोले हानेर हत्या

समाचार

- न्युज नेपाल

सुर्खेत । सुर्खेतको पञ्चपुरी नगरपालिका–६ मा मृत्त भेटिएका २१ वर्षीय युवकको (नाम गोप्य राखिएको) आफ्नै बाबुले हत्या गरेको प्रारम्भिक अनुसन्धानमा देखिएको छ ।

युवक सोमबार राति आफ्नै घर छेउमा मृत भेटिएका थिए । शरीरका विभिन्न भागमा चोट लागेको अवस्थामा राति १ बजेतिर फेला परेका उनको आफ्नै बाबुले हत्या गरेको अनुसन्धानमा देखिएको प्रहरीले जनाएको छ ।

बहिनी बलात्कृत भएको थाहा पाएपछि बाबुविरुद्ध जाहेरी दिँदा बाबुले नै छोराको हत्या गरेको प्रहरीको प्रारम्भिक अनुसन्धानबाट खुलेको हो । गत सोमबार बञ्चरोले हानेको अवस्थामा युवकको शव फेला परेको थियो । जिल्ला प्रहरी कार्यालमा कात्तिकमा आफ्नै छोरीलाई बलात्कार गरेको भन्दै छोराले आफ्नै बाबुविरुद्ध जाहेरी दिएका थिए ।

प्रहरीमा छोराले जाहेरी दिएको थाहा पाउन साथ बुबा फरार थिए । पीडित छोरीले बुबा नै आएर दाजुको हत्या गरेको दाबी गरेको जिल्ला प्रहरी कार्यालय सुर्खेतका प्रमुख प्रहरी उपरीक्षक योगेन्द्रसिंह थापाले जानकारी दिएका छन् । रातिको घटना भएकाले विस्तृत अनुसन्धान भइरहको प्रहरी उपरीक्षक थापाले बताएका छन् । यता स्थानीयवासीले युवकको हत्यामा उनकै बाबु संलग्न रहेको प्रमाणहरू फेला परेका बताएका छन् ।

‘पारिवारिक मनमुटाबका कारण हत्या भएको देखिन्छ,’ उपरीक्षक थापाले भने । स्थानीयका अनुसार हत्या योजनाबद्ध रूपमा भएको छ । गत असोज २७ गते १९ वर्षीया ‘६४ वीरेन्द्रनगर क ३६’ लाई बलात्कार गरेको भन्दै प्रहरीमा जाहेरी परेको थियो । मामाघर बस्दै आएकी छोरी बुबा भारतबाट घर फर्केपछि भेट्न बोलाएर बलात्कार गरेको जाहेरीमा उल्लेख छ ।

आफू बाबुबाट बलात्कृत भएको कुरा किशोरीले दाइलाई सुनाएकी थिइन् । दाइले गत कात्तिक १५ गते जिल्ला प्रहरी कार्यकाल सुर्खेतमा बुबाविरुद्ध जबरजस्ती करणीको जाहेरी दिएका थिए । बुबाले छोरीलाई मुद्दा नहाल्न भन्दै धम्की समेत दिएको अनुसन्धानमा देखिएको प्रहरीको भनाइ छ । मुद्दा परेपछि उनी श्रीमतीसहित भागेर भारत पसेका थिए ।

पीडित छोरीले भारतमा लुकेर बसेका बुबाले नै नेपाल आएर दाजुको हत्या गरेर भागेको दाबी गरेकी छन् । ‘प्रहरीको अनुसन्धानमा जनवरीको १२ र १३ तारिखमा भारतबाट नेपालमा आएको खुलेको छ । १४ मा नेपाल पुगेर १५ तारिख राति हत्या गरेर भागेको हुनसक्छ,’ अनुसन्धान खटिएका एक प्रहरी अधिकृतले भने, ‘बुबामाथि शंका गर्ने आधारहरू भेटिदै गएका छन् ।’ यता पीडतले पनि बुबाले नै हत्या गरेको प्रारम्भिक बयान समेत दिएकी छिन् । उनले आफूलाई बलात्कार गरेको घटनाले बुबा र दाजुबीच विवाद बढेको बयानमा बताएकी छिन् ।