विद्युतीय व्यापार विधेयकसम्बन्धी समितिको प्रतिवेदन पेस

breaking news

काठमाडौं । प्रतिनिधि सभाको आजको बैठकमा विद्युतीय व्यापार विधेयक सम्बन्धी उद्योग तथा वाणिज्य र श्रम तथा उपभोक्ता हित समितिको प्रतिवेदन पेश भएको छ ।

बैठकमा उद्योग तथा वाणिज्य र श्रम तथा उपभोक्ता हित समितिका सभापति अब्दुल खानले विद्युतीय व्यापार विधेयक सम्बन्धी समितिको प्रतिवेदन २०८१ पेश गर्नुभयो ।

यस्तै बैठकमा कानून न्याय तथा संसदीय मामिला मन्त्री अजयकुमार चाैरसियाले कानून न्याय तथा मानव अधिकार समितिको प्रतिवेदन सहितको विधायन विधेयक २०८० माथि छलफल गरियोस् भन्ने प्रस्ताव पेश गर्नुभयो ।

यस अघि प्रतिनिधि सभाको आजको बैठकमा सांसदहरूले विकास निर्माणका कामलाई तीव्रता दिन तथा किसानलाई सहज रुपमा रासायनिक मल उपलब्ध गराउन सरकारको ध्यानाकर्षण गराउनुभयो ।

बैठकको शून्य समयमा बोल्दै सांसदहरूले हेटौडा सिमेन्ट उद्योगको सञ्चालनमा देखिएको समस्या समाधान गर्न तत्काल ध्यान दिन, सहकारी पीडितको बचत रकम फिर्ता गरी समस्याको स्थायी समाधान खोज्न, काठमाडौँ उपत्यकाको ट्राफिक व्यवस्थापनलाई सहज बनाउन वैकल्पिक सडक तथा फ्लाईओभरहरु निर्माणमा जोड दिन सरकारको ध्यानाकर्षण गराउनुभयो ।

यस्तै बैठकमा सांसदहरूले शिक्षा, स्वास्थ्य र खानेपानी जस्ता नागरिकका आधारभूत आवश्यकतालाई सरल र सहज बनाउन, सिद्धार्थ राजमार्ग अन्तर्गतको बुटवल पाल्पा सडक खण्ड सहित सडक दुर्घटनाको जोखिम रहेका सडक खण्डहरूको स्तर उन्नति गरी दुर्घटना न्यूनीकरणका लागि ध्यान दिन पनि सरकारको ध्यानाकर्षण गराउनुभयो ।

प्रतिनिधि सभाको आर्को बैठक माघ २७ गते आइतबार दिउँसो १ बजे बस्ने छ ।