थाइल्याण्ड र कम्बोडियावीचको सिमा विवाद थप चर्किँदै, थाइल्याण्डका ९ स्थानीयको मृत्यु

राजनीति

काठमाडौं । थाइल्याण्ड र कम्बोडियाबीच सीमा विवाद चर्किंदा थाइल्याण्डका कम्तीमा ९ जना स्थानीयको मृत्यु भएको छ ।

दक्षिणपूर्वी एशियाका छिमेकी मुलुकहरुबीच बिहिवार फेरि गोली हानाहान भएपछि थाइल्याण्डले कम्बोडियासंगको सम्पूर्ण सीमा समेत बन्द गरेको छ । कम्बोडियामा रहेका आफ्ना नागरिकलाई मुलुक छोड्न समेत थाइल्याण्डले निर्देशन दिएको छ ।

साथै सीमावर्ती ८६ वटा गाउँबाट करिब ४० हजार स्थानीयलाई सुरक्षित स्थानमा सारेको छ । आफ्ना सैनिक क्षेत्रमा आक्रमण गर्नकालागि थाइल्याण्डले युद्धक विमान पठाएको आरोप कम्बोडियाले लगाएको छ ।

सन् २००८ मा कम्बोडियाले विश्व सम्पदा सूचीमा सूचीकृत ११ औं शताब्दीको एउटा मन्दिर भएको क्षेत्रलाई आफ्नो कब्जामा लिन प्रयास गरेयता दुबै मुलुकबीच सीमा विवाद बढेको हो ।

त्यस यता भएका संघर्षमा परी दुबैतर्फ सर्वसाधारण नागरिककासाथै सैनिकको समेत मृत्यु भएको छ । दुई महिना अघी मात्र कम्बोडियाका एक सैनिक थाइल्याण्डको आक्रमणमा परी मारिएपछि दुबै मुलुकको सम्बन्ध निक्कै बिग्रिएको छ ।

दुबै मुलुकले एक अर्काको मुलुकबाट आआफ्नो राजदूतलाई फिर्ता बोलाएका छन् । कम्बोडियाले थाइल्याण्डबाट फलफुल, तरकारीकासाथै बिजुली र इन्टरनेट सेवाको आयातमा समेत रोक लगाएको छ ।