प्रधानमन्त्री,कांग्रेस सभापति र गृहमन्त्रीबीच ‘आईजीपी’ बनाउने विषयमा चर्काचर्की,मन्त्रीपरिषद् वैठक समेत स्थगित

काठमाडौं । कांग्रेस सभापति शेरबहादुर देउवा र गृहमन्त्री विमलेन्द्र निधिबीच प्रहरी महानिरीक्षक “आईजीपी” बनाउने विषयलाई लिएर चर्को विवाद भएको छ । स्रोतका अनुसार सभापति देउवा प्रहरी नायव महानिरीक्षक “डीआइजी”जयबहादुर चन्दलाई आईजीपी बनाउने कसरतमा छन भने गृहमन्त्री निधि डीआइजी नवराज सिलवालको पक्षमा देखिएका छन् ।

कांग्रेस संसदीय दलमा केही दिनअघि आईजीपी कसलाई बनाउने भन्ने विषयमा पार्टी पदाधिकारी र गुहमन्त्रीबीच बैठक समेत भएको थियो । बैठकमा देउवा र निधिबीच चर्काचर्कीसमेत भएको स्रोतले जनायो । देउवाले सुदूरपश्चिमका चन्दलाई बनाउन बारम्बार दवाव दिएपछि गृहमन्त्री निधिले सरकारको कामकारवाहीमा हस्तक्षेप नगर्न आग्रह गर्दै आएका छन् । तर, देउवाले चन्दलाई आईजीपी नबनाउने हो भने पद छाड्न भन्दै निधिलाई दवाव दिँदै आएको स्रोतले बतायो ।

सुदुपश्चिमका सांसद तथा पार्टीका नेताहरुले पनि चन्दलाई आईजीपी बनाउन गृहमन्त्रीलाई भेटेरै बारम्बार लबिङ गर्न थालेपछि गृहमन्त्री निधि पार्टी सभापतिसँग आक्रोशित बनेका छन् । पहिलो एकै दिन प्रहरी सेवामा प्रबेश गरेकालाई बरियादाक्रम लगाउनु नहुने आवाज पनि उठ्ने गरेको छ । आईजीपी बनाउने बिषयलाई लिएर बढेको विवादका कारण गृहमन्त्री निधि पार्टी सभापति देउवाको निवाससमेत जान छाडेका छन् ।

आईजीपी बनाउने बिषयमा सभापति र गृहमन्त्रीबीच विवाद बढेपछि विकल्पमा देउवा पक्षकै एक थरी नेताहरुले चौथो बरियातमा रहेका बमवहादुर भण्डारीलाई बनाउन सुझाएका छन् । ‘सभापति र गृहमन्त्री दुवैले हारेकोस्थिति बन्न भएन भन्ने हाम्रो भनाई हो,’ दुई नेताबीचको विवाद मिलाउन जुटेका कांग्रेसका एक नेता भन्छन्, ‘यो विवाद बढ्दै जाँदा पार्टीभित्रै समस्या आउने देखिएको छ ।’

प्रधानमन्त्री प्रचण्ड र  शेरबहादुर देउवावीच पनि विवाद चर्किएको छ । यही विवादका कारण आज (२७ माघ) बस्ने भनिए को मन्त्रिपरिषद बैठकसमेत स्थगित भएको छ । यही साता अवकाश पाउन लागेका प्रहरी महानिरीक्षक उपेन्द्रकान्त अर्यालका ठाउँमा बरियताका आधारमा डीआइजी नवराज सिलवाललाई आइजी बनाउनुपर्ने अडानमा प्रधानमन्त्री प्रचण्ड उभिएका छन् ।

महानिरीक्षक चयनको किचलोकै कारण पदावधी सकिनुभन्दा एक महिना अघि नै महानिरीक्षक बिदामा बस्ने चलन समेत तोडिएको छ । महानिरिक्षक उपेन्द्रकान्त अर्यालले समयमै नयाँ महानिरीक्षक चयनका लागि बारम्बार प्रधानमन्त्री र गृहमन्त्रीसँग आग्रह गर्दै आइरहेका छन् ।

अहिलेका प्रहरी महानिरिक्षकका दावेदाहरुमा प्रहरी निरिक्षकहुदाँ प्रकाश अर्याल एक नम्बरमा र नवराज सिलवाल अन्तिम नम्बरमा नाम टाँसिएको प्रहरी किताव खानाको रेकर्डमा देखिएको छ । त्यसैगरि आइजीपीका दावेदाहरुमा सबै भन्दा बढी जयबहादुर चन्दले तालिम लिएका छन  ।

Comments