एसएसपी खत्रीको भूमिगत सुन र साडी पसलमा लगानी

समाचार

काठमाडौं ३० फागुन । साढे ३३ किलो सुनकाण्डमा मुछिएर थुनामा रहेका एसएसपी श्याम खत्रीले श्रीमतीका नाममा सुन पसल दर्ता गरेको र साडी पसलमा ब्याजमा रकम लगानी गरेको खुल्न आएको छ । खत्रीको बैंक खाता भने अझै सार्वजनिक भइसकेको छैन ।

एसएसपी खत्रीसहित ३३ जनाविरुद्ध मुद्दा चलाएको सीआइबीले १२ जनालाई पक्राउ गरिसकेको छ । पक्राउ परेका सबैको सम्पति विवरण खोजी भैरहेको हो ।

यसअघि सीआइबीले भन्सार कर्मचारी र व्यपारीहरुको अस्वभाविक बैंक कारोवार संकलन गरिसकेको छ । तर, एसएसपी खत्री भने केही समयपछि पक्राउ परेकाले उनको बैंक विवरण आइनसकेको प्रहरीले जनाएको छ ।

खत्रीको बैंक कारोवारबारे राष्ट्रबैंक मार्फत विवरण मागिएको छ । त्यस्तै उनको अन्य घर जग्गा तथा सम्पतिका बारेमा पनि मालपोत कार्यलयदेखि अन्य निकायसँग पनि विवरण माग भैसकेको सीआइबीले जनाएको छ ।

सुन तस्करीलाई साथ दिएको आरोपमा पक्राउ परेका खत्रीले तीन वर्ष अगाडि नै श्रीमतीका नाममा सुन पसलको लाइसेन्स लिएका थिए । तर त्यो सञ्चालनमा नआउँदै बिक्री गरेको खुल्न आएको छ ।

सीआइबीको अनुसन्धानका क्रममा एसएसपी खत्रीले श्रीमतीका नाममा अलंकार इन्टरप्राइज नामको सुन पसल दर्ता गराएको खुलेको हो । उनले श्रीमतीका नाममा करिब चार वर्ष अघि सुन पसल दर्ता गराएका थिए । नामको गहना तथा सुन पसलका लागि अनुमति लिए पनि उक्त सुन पसल भने कतै भेटिएको छैन ।

एसएसपी खत्रीले एकजना साडी व्यापारीलाई १७ लाख रुपैंया ब्याजमा लगानी गरेको पनि भेटिएको छ । न्युरोडमा सञ्चालित रितु इन्टरप्राइजेका सञ्चालकलाई लगानी गरेको १७ लाखको स्रोत नदेखिएको सीआईबीले जनाएको छ । सुरुमा मासिक २ प्रतिशतमा ब्याजमा रकम लगाएका उनले पछि ब्याज बढाएर ३ प्रतिशत पु¥याएपछि रकम फिर्ता लिएका थिए ।