सिके राउतलाई पक्राउ गर्दा कुर्लिने मानवअधिकारकर्मी देवनारायणलाई पक्राउ गर्दा कहाँ गए ?

समाचार

काठमाडौं, १८ असोज । यतिबेला सीमा बचाउँ अभियानका अभियान्ता सप्तरी तिलाठीका देवनारायण यादव र उनका छोरा यतिबेला भारतीय हिरासतमा छन् । उनीहरुबिरुद्ध अपहरण मुद्धा दायर गरिएको छ । देवनारायण यादव र उनको छोरा अजयलाई भारतीय प्रहरीले पक्रेर अपहरणको मुद्दा चलाएको छ ।

भारतको सुनौली गएका बेला प्रहरीले अजयलाई पक्रेको थियो । छोरालाई छुटाउन गएका देवनारायणलाई पनि भारतीय प्रहरीले नियन्त्रणमा लिएको थियो । उनीहरु दुबैलाई भारतीय सुरक्षाकर्मीले गाइ वस्तुलाई जस्तो बाँधेर राखिएको छ । यादव बाबुछोरालाई सुपौल जिल्लाको बीरपुर थानामा राखिएको छ । उनीहरुलाई यतिबेला पशु समान व्यवहार गरेर राखिएको छ । हातमा हतकडी लगाएर गाई बस्तुलाई बाध्ने डोरीले बाधिएको छ । यो एउटा अमानविय व्यवहार हो । जुन भारतीय प्रहरीले देखाएको छ ।

सिके राउतलाई गिरफ्तार गर्दा कुर्लिने मानवअधिकारकर्मीहरु यतिबेला तमासा हेरेर बसिरहेका छन् । उनीहरुले नेपाललाई विखण्डन गर्न खोजनेलाई गिरफ्तार गर्दा तुरुन्तै प्रतिक्रिया दिन्छन् । तर एक सीमा बचाउँका अभियान्तलाई भारतीय प्रहरीले पक्राउ गर्दै गाइ वस्तुलाई जस्तो बाँधेर राख्दा किन बोल्दैनन् ?

गत वर्ष सीमा अतिक्रमण गर्दै खाँडो खोलामा बाँध बाध्न आएका भारतीयको प्रतिकार गरेका यादवलाई भारतीयले निगरानीमा राख्दै आएको र अहिले झुठो आरोपमा मुद्दा लगाएको स्थानीयको दाबी छ ।

देवनारायणका छोरा अजयले भारतीय युवतीसँग हालै बिहे गरेका छन् । केटी पक्षले अपहरण गरेको भन्दै उजुरी गरेपछि यादव बाबुछोरालाई पक्रेर अनुसन्धान थालेको भारतीय प्रहरीको भनाइ छ । तर तिलाठीका बासीन्दाले भने यसलाई भारतीयको अतिक्रमणको विरोध गर्दै आएका यादवलाई फसाउन खोजिएको षडयन्त्रको रुपमा लिएका छन् ।