यू-१९ क्रिकेट तेस्रो अभ्यास खेलमा नेपालद्धारा बंगलादेश ६ विकेटले पराजित

खेलकुद

काठमाडौं, १९ कात्तिक । यू-१९ टिमसँगको तेस्रो अभ्यास खेलमा नेपालले बंगलादेशलाई ६ विकेटले हराएको छ । नेपाल यसअघिका दुवै खेलमा पराजित भएको थियो । पहिलो खेलमा गत बिहीबार नेपाल तीन विकेटले हारेको थियो भने दोस्रो खेल शनिबार १२३ रनले पराजित भएको थियो ।

बंगलादेशले दिएको २२६ रनको लक्ष्य नेपालले ४ विकेट गुमाएर ४६.३ ओभरमै पूरा गर्‍यो । नेपाली ब्याट्सम्यानहरुको शानदार प्रदर्शन रहेको आजको खेलमा ओपनर आसिफ शेखले ९० रन बनाए । उनले ८८ बलमा ९ चौका र ३ छक्का प्रहार गरे ।

पहिलो विकेटका लागि आसिफले जितेन्द्र सिंहसँग मिलेर १३९ रनको ठोष साझेदारी गरेका थिए । सिंह ४५ रनमा आउट भएपछि आएका अनिल साहले १५ रनमात्र बनाउन सके । रोहित पौडेलले पनि नेपालको खातामा २५ रन थपे ।

कप्तान दीपेन्द्र सिंह ऐरीले ३५ बलमा ३ चौकाको सहायताले २७ रजको अविजित पारी खेले । १० बलमा १३ रन बनाएका भीम सार्कीले छक्का प्रहार गर्दै नेपाललाई ६ विकेटको जित सुनिश्चित गरेका थिए ।

बलिङतर्फ बंगलादेशका रोनी हसन, काजी अनिक इस्लाम, शाखावात हुसेन र सइफ हसनले एक एक विकेट लिए । यसअघि टस जितेर ब्याटिङ गरेको बंगलादेश यू-१९ ले निर्धारित ओभरमा ७ विकेट गुमाएर २२५ रनको योगफल बनँएको थियो ।

नेपाली र बंगलादेशी टोली आगामी कात्तिक २४ देखि मंसिर ३ सम्म मलेसियामा हुने एसीसी यू-१९ एसियाकपको तयारीमा छन् । प्रतियोगितामा दुवै टोली एकै समूहमा छन् । नेपाल र बंगलादेशका अलावा आयोजक मलेसिया र भारत समूह ए मा छ ।

नेपालले आफ्नो पहिलो खेल कात्तिक २५ गते बंगलादेशसँगै खेल्नेछ । दोस्रो खेल २६ गते साविक बिजेता भारतसँग र तेस्रो खेल २८ गते आयोजक मलेसियासँग खेल्नेछ ।