अब मन्त्रिपरिषद्को निर्णय पत्रकार सम्मेलन गरे सुनाइने

समाचार

काठमाडौँ । अब मन्त्रिपरिषद्को निर्णय पत्रकार सम्मेलन गरे सुनाइने भएको छ । सरकारका प्रवक्ताले प्रत्येक साता पत्रकार सम्मेलन गरेर मन्त्रिपरिषद् वैठकले गरेको निर्णय सुनाउने छन् ।

आइतबार प्रधानमन्त्री निवास बालुवाटारमा बसेको बैठकपछि बाहिर निस्किएका सरकारका प्रवक्ता सञ्चार तथा सूचना प्रविधि मन्त्री गोकुलप्रसाद बाँस्कोटाले पत्रकारहरिसँग बोल्दै उक्त कुरा बताएका हुन् । मन्त्री बाँस्कोटाले भने–आज धेरै विषयमा छलफल भयो, आवश्यक निर्णयहरू गरिएको छ। समयक्रममा तपाईंहरूले थाहा पाइहाल्नु हुन्छ।सधैँझैं मन्त्रिपरिषद् बैठकपछि निर्णय सुन्न बालुवाटार पुगेका पत्रकार उनको कुराले अलमलिए।

मन्त्री बाँस्कोटाले थपे– विस्तृतमा दिनका लागि केही प्रबन्ध गर्दैछौं। फरक व्यवस्थाका साथ आउँछौं होला। मन्त्रिपरिषद् निर्णय पनि सरकारले लुकाउन खोजेको भन्दै सामाजिक सञ्जालमा यसको विरोध भइरहेको छ। प्रधानमन्त्रीको सचिवालय र मन्त्रीहरूले सूचना लुकाउन नभइ व्यवस्थित गर्न मन्त्रिपरिषद्लगत्तै निर्णय सार्वजनिक गर्ने चलन रोकिएको बताएका छन्।

परराष्ट्र मन्त्री प्रदीप ज्ञवालीले निर्णय लुकाउन नभइ अझ विस्तृत र व्यवस्थित रूपमा दिन नयाँ चलन सुरु गर्न लागेको बताए। प्रधानमन्त्रीका प्रेस सल्लाहकार कुन्दन अर्यालले सातामा एक दिन पत्रकार सम्मेलन गरेर मन्त्रिपरिषद्ले गरेका निर्णय र सरकारका कामबारे जानकारी दिने तयारी भइरहेको जानकारी दिए।

सातामा एक दिन सिंहदरबारमा सरकार प्रवक्ताले पत्रकार सम्मेलन गरेर के निर्णय भयो र किन यस्तो निर्णय भयो भन्ने जानकारी दिनुहुन्छ, अर्यालले भने, ‘त्यो पत्रकार सम्मेलनमा मन्त्रिपरिषद् निर्णयसँग सरकारका अरू कामबारे पनि उहाँले बोल्नुहुन्छ। पत्रकारले प्रश्न पनि सोध्न पाउँछन्।’ मन्त्रिपरिषद् निर्णयबारे हतारमा सबै कुरा भन्न नसकिने, राम्ररी रिपोर्टिङ पनि नहुने भएकाले नयाँ व्यवस्था ल्याउन लागिएको अर्यालले बताए।