मानव तस्करीको आरोप लागेकी राजदूत शेर्पासँग छानबिन समितिले बयान लिने

समाचार

काठमाडौँ । मानव तस्करीको आरोप लागेकी अस्ट्रेलियाका लागि नेपाली राजदूत लक्की शेर्पामाथि सरकारले अनुसन्धान सुरु गरेको छ। परराष्ट्र मन्त्रालयले छानबिन टोली गठन गरी उनलाई मन्त्रालय झिकाएर छानबिन थालेको हो ।

राजदूत शेर्पा आइतबारदेखि सिंहदरबारस्थित परराष्ट्र मन्त्रालयमा हाजिर गरेकी छिन्। उनले आइतबार नै परराष्ट्र मन्त्री प्रदीपकुमार ज्ञवाली र परराष्ट्र सचिव शंकरदास बैरागीसँग स्पष्टीकरण दिएको परराष्ट्र मन्त्रालयले जानकारी दिएको छ ।

परराष्ट्र मन्त्रालयका सहप्रवक्ता रामबाबु ढकालले राजदूत शेर्पा आइतबार देखि सिंहदरबारमा हाजिर भएको जानकारी दिँदै समितिले उनीमाथि छानबिन सुरु गरेको पुष्टि गरे। मन्त्रालयले उनीमाथि लागेको आरोपको छानबिन गर्न तीन सदस्यीय छानबिन टोली गठन गरेको छ ।

मन्त्रालयका प्रशासन महाशाखा प्रमुख मणि भट्टराई अस्ट्रेलिया हेर्ने महाशाखा प्रमुख तपस अधिकारी र शिष्टाचार महापाल दीपक अधिकारी सम्मिलित छानबिन समिति गठन गरेको छ। आज समितिले उनीसँग बयान लिने स्रोतले बतायो। उनले आइतबार नै छानबिन समितिका सदस्यहरूसँग छुट्टाछुट्टै आफ्ना कुरा राखेको परराष्ट्र स्रोतले जानकारी दियो।

राजदूत शेर्पाका सवारी चालक वाङ्छु शेर्पाले उनीमाथि मावन तस्करीमा सहयोगी बनेको आरोप लगाएका छन्। उनले आफूसँग पनि शेर्पाले रकम लिएर अस्ट्रेलिया पुर्‍याएको आरोप लगाएका छन्।