प्रस्तावित प्रधानन्यायाधीशविरूद्ध उजुरी आह्वान, पुस ११ गतेसम्म उजुरी दिन सकिने

समाचार

काठमाडौँ । संवैधानिक परिषद्ले प्रधानन्यायाधीशमा सिफारिश गरेका चोलेन्द्र शमशेर जबराको संसदीय सुनुवाइ प्रक्रिया सुरु भएको छ। यसअघि गत बिहिबार बसेको संवैधानिक परिषदको बैठकले जबरालाई प्रधानन्यायाधीशमा सिफारिस गर्ने निर्णय गर्दै सुनुवाइ गर्न समितिलाई पत्राचार गरेको थियो। सोही पत्राचारमाथि छलफल गर्दै समितिले प्रधानन्यायाधीशमा सिफारिस जबराविरूद्ध उजुरी आह्वान गरेको हो।

संसदीय सुनुवाइ समितिले सोमबार सूचना जारी गर्दै जबराविरूद्ध उजुरी आह्वान गरेको छ। जबराविरूद्ध पुस ११ गतेसम्म उजुरी दिन सकिने समितिले जनाएको छ।

प्रधानन्यायाधिशमा सिफारिस जबराविरुद्ध आह्वान गरिएको उजुरीको म्याद सकिएपछि समितिले उजुरीकर्तासँग आवश्यक छलफल गर्छ। समिति सभापति लक्ष्मणलाल कर्णले उजुरीकर्ताको उजुरीउपर छलफल गरेपछि तत्काल प्रधानन्यायाधीशमा सिफारिस जबरासँग सुनुवाइ हुने बताए।

समितिले जबराको सुनुवाइ चित्त बुझे प्रधानन्यायाधीशमा उनको नाम अनुमोदन गर्नेछ। संसदीय सुनुवाइ विशेष समितिले अनुमोदन गरेपछि जबरालाई राष्ट्रपतिले प्रधानन्यायाधीशमा नियुक्त गर्ने संवैधानिक व्यवस्था छ।