कांग्रेसका शिर्ष नेताहरु विभिन्न जिल्लामा, यी हुन आन्दोलनका मुख्य मुद्धा

समाचार

केन्द्रिय समितिको पूर्व घोषित कार्यक्रम अनुसार नेपाली कांग्रेसले आज देशभरी नै सरकार विरुद्ध विरोध प्रदर्शनका कार्यक्रम गर्दैछ ।

वाइडबडी खरिदमा भएको घोटाला, ३३ किलो सुन काण्ड, निर्मला पन्त हत्या प्रकरणको निष्पक्ष छानबिन लगायतका विषयमा सरकारसँग असन्तुष्ट रहेको काँग्रेसले ७७ वटै जिल्लामा प्रदर्शन गर्न लागेको हो ।

साथै बूढीगण्डकी बहुउद्देश्यीय परियोजना विनाप्रतिस्पर्धा चिनियाँ कम्पनीलाई दिने सरकारी निर्णय, भेनेजुएला प्रकरणमा सरकार र नेकपाले गरिरहेको अमेरिकाको विरोध, महँगी, भ्रष्टाचार तथा अनेकौँ जनविरोधी निर्णयहरु पनि कांग्रेस आन्दोलनका मुख्य एजेण्डा हुन् ।

यसैबीच शीर्ष तहका नेताहरु विभिन्न जिल्लामा परिचलन गरिएका छन् । नेपाली कांग्रेसका प्रवक्ता विश्वप्रकाश शर्माका अनुसार पार्टी सभापति शेरबहादुर देउवाले काठमाडौँको विरोध सभालाई सम्बोधन गर्नेछन् । वरिष्ठ नेता रामचन्द्र पौडेलले गृहजिल्ला तनहुँ , उपसभापति विमलेन्द्र निधि धनुषा र सहमहामन्त्री प्रकाशशरण महतले दाङमा हुने विरोध सभालाई प्रदर्शन गर्ने कार्यक्रम रहेको छ ।

त्यस्तै महामन्त्री डा. शशाङ्क कोइरालाले नवलपरासी, शेखर कोइरालाले मोरङ, गगन थापाले पोखरा र प्रवक्ता विश्व प्रकाश शर्माले चितवनको कार्यक्रमलाई सम्बोधन गर्ने कांग्रेसले जनाएको छ ।

यसैगरि केन्द्रीय सदस्य अर्जुनरसिंह केसीले नुवाकोटमा हुने विरोध सभालाई सम्बोधन गर्दैछन् । काठमाडौँमा १ बजेपछि हुने विरोध प्रदर्शनका लागि सहरका विभिन्न स्थानबाट र्याली निकाल्ने र रत्नपार्कस्थित शान्ति बाटिकामा कोणसभामा परिणत गर्ने काँग्रेसले जनाएको छ ।

माघ १३ गते बसेको केन्द्रीय समितिको बैठकले सरकारविरोधी प्रदर्शन गर्ने निर्णय गरेको थियो ।