पार्टी सभापति देउवालेनै गर्ने भए नेविसंघको तदर्थ समिति गठन

समाचार

नेपाली कांग्रेसको भातृ संस्था नेपाल विद्यार्थी संघको तदर्थ समिति गठनको जिम्मेवारी पार्टी सभापति शेरबहादुर देउवालाई नै दिइएको छ।

कांग्रेस केन्द्रीय कार्यसमितिको बुधबारको बैठकपछि जारी विज्ञप्ति अनुसार, सभापति देउवाले आवश्यक परामर्श गरी तदर्थ समिति गठन गर्ने जिम्मा दिइएको छ।

विधान अनुसार दुई वर्षको कार्यकालभित्र मात्र होइन त्यसपछि थपिएको पाँच महिनाभित्र समेत निवर्तमान सभापति नैनसिंह महर नेतृत्वको समितिले अधिवेशन गरी नयाँ नेतृत्व चयन गर्न नसकेपछि उक्त समिति मंगलबारको बैठकले स्वत विघटन भएको घोषणा गर्दै उनले पछिल्लो समय गरेका सबै निर्णय खारेज गरेको थियो।

महरले राजीनामा बुझाए लगत्तै देशभरीका विभिन्न जिल्लामा मनपरी जिल्ला सभापति र पदाधिकारीदेखि सदस्यहरुको मनोनयन गरेको पत्र पठाएको सार्वजनिक भएपछि हिँजोको पार्टी बैठकमा उनले गरेका त्यी निर्णय खारेज गर्दै एकप्रकारले उनीमाथि दण्ड गरेको थियो। आजको बैठकमा पनि केहि केन्द्रीय सदस्यहरुले अनुशासन विपरित कार्य गर्ने महरमाथि कारबाहीको माग पनि गरेका थिए।

यसैबीच नेविसंघको तदर्थ समिति गठनमा नेताहरुबीच स्वार्थ बाझिएपछि तत्काल निकास निस्कने सम्भावना क्षिण बन्दै गएको छ। एकथरीले आसन्न स्ववियू निर्वाचन र महाधिवेशन सम्पन्न गर्न ३२ माथिकै केहि नेताहरु समेटेर तदर्थ समिति बनाउन नेतृत्वलाई सुझाव दिएका छन् भने कतिपयले संघको नयाँ विधान वमोजिम ३२ मुनिकै विद्याथीमध्येबाट समिति बनाउन जोड दिइरहेका छन्।

सभापति देउवाले कुन पक्षको कुराबाट प्रभावित भएर कुन नेता निकट विद्यार्थीलाई संघको नेतृत्व सुम्पिने हुन त्यो सार्वजनिक हुन बाँकी नै छ।