सरकारी चिकित्सकहरुले गरे सामूहिक राजीनामा दिने घोषणा

समाचार

काठमाडौं।

कर्मचारी समायोजन विधेयक विरुद्ध आन्दोलनरत सरकारी चिकित्सकहरुले आइतबार विभिन्न आन्दोलनका कार्यक्रम घोषणा गरेका छन् ।

आइतबार पत्रकार सम्मेलन गर्दै सरकारी चिकित्सकहरुले सामूहिक राजीनामा दिने लगायतका आन्दोलनका कार्यक्रम घोषाणा गरेका हुन् ।

सरकारी चिकित्सक संघ, नेपाल (गोदान)ले सो विधेयक सच्याउन सरकारलाई बाध्य पार्न सामुहिक राजीनामा दिने लगायतका एक हप्ते सशक्त आन्दोलनको कार्यक्रम घोषणा गरेको हो।

घोषित कार्यक्रममा सो विधेयक सच्याउन राष्ट्रपति विद्या भण्डारी र राष्ट्रिय सभाका अध्यक्ष गणेशप्रसाद तिमिल्सिनासँग एक पटक आग्रह गर्ने र त्यसो नभए आकस्मिक बाहेकका सबै सेवा बहिष्कार गरी देशभर अवज्ञा आन्दोलन सुरु गर्ने निर्णय गरिएको संघका अध्यक्ष डा. दिपेन्द्र पाण्डेले जानकारी दिए।

प्रतिनिधिसभाबाट सो विधेयक आफूहरुको मागलाई सम्बोधन नगरी पारित भएको भन्दै भोलि ९सोमबार० देशभरका चिकित्सकहरुले सो विधेयक सच्याउन सरकारलाई दबाव दिँदै स्वेच्छिक सामुहिक राजीनामाका लागि हस्ताक्षर अभियान संचालन गर्नेछन्।

मंगलबार माईतीघर मण्डलामा आफूहरुको आन्दोलनका लागि साथ सहयोग गर्न सर्वसाधारणलाई अपिल गर्दै रक्तदान कार्यक्रम आयोजना गर्न लागिएको पनि अध्यक्ष पाण्डेले बताए। बुधबार सामूहिक विदामा बस्ने, बिहीबार राजीनामा संकलन भएपश्चात सरकारलाई बुझाउन काठमाडौं भेला हुने तथा त्यसो गर्दा पनि आफूहरुको माग सरकारले सम्बोधन नगरे सबै अस्पतालको सेवा बहिष्कार गरी अवज्ञा आन्दोलन सुरु गर्ने सरकारी चिकित्सकहरुले सरकारलाई चेतावनी दिएका छन्।