शाखा अधिकृत विरुद्ध ३ करोड बिगो दावीसहित भ्रष्टाचारको मुद्धा

समाचार

राजश्व अनुसन्धान विभाग ललितपुरका तत्कालिन शाखा अधिकृत रामजी रिजालविरुद्ध अख्तियार दुरुपयोग अनुसन्धान आयोगले मुद्धा दायर गरेको छ ।

अख्तियारले रिजालविरुद्ध अवैधानिक स्रोतबाट सम्पत्ति आर्जन गरेको भन्दै झन्डै ३ करोड रुपैयाँ बराबर बिगो दावीसहित मुद्धा दायर गरेको हो ।

अख्तियारले स्रोत नखुलेको रकम २ करोड ९७ लाख ३८ हजार ३ सय १० रुपैयाँ बराबर बिगो तथा जरिवाना र कैद सजाय माग गर्दै सोमबार विशेष अदालतमा मुद्दा दायर गरेको हो ।

६ कात्तिक २०४० देखि ५ वैशाख २०४१ सम्म खानेपानी तथा ढल निकास विभाग पोखरामा अस्थायी सेवामा काम गरेका रिजाल ११ वैशाख २०४१ देखि भूमि सुधार तथा व्यवस्था मन्त्रालयको खरिदार पदमा स्थायी नियुक्त भएका थिए । पछि १५ वैशाख २०७४ मा रिजाल राजश्व अनुसन्धान विभागको शाखा अधिकृत पदबाट सेवा निवृत्त भएका थिए ।

सेवामा रहँदा रिजालले तलव तथा प्रोत्साहन भत्ता र उनकी श्रीमती स्वस्थानी रिजालको पारिश्रमिकलगायत व्यवसायबाट १ करोड ९६ लाख ८६ हजार ५ सय ९ रुपैयाँ वैध रुपमा आम्दानी गरेको देखिएको अख्तियारले जनाएको छ । तर, सोही अवधिमा रिजालले विभिन्न क्षेत्रमा ४ करोड ९४ लाख २४ हजार ८ सय १९ रुपैयाँ खर्च गरेको अख्तियारको छानबिनबाट फेला परेको छ ।

रिजालले वैध रुपमा गरेको आम्दानी र खर्चको हिसाव गर्दा २ करोड ९७ लाख ३८ हजार ३ सय १० रुपैयाँ बराबरको स्रोत नखुलेको देखिएको छ ।