सरुवा भएको ठाउँमा नजाने प्रमुख प्रशासकीय अधिकृत निलम्बित

समाचार

काठमाडाैँ । रौतहट सदरमुकाम गौर नगरपालिकाका प्रमुख प्रशासकीय अधिकृत सुमन कार्की निलम्बनमा परेका छन्।

कार्की पटक–पटक सरुवा हुँदा पनि तोकिएको स्थानमा जान नमाने पछी संघीय मामिला तथा सामान्य प्रशासन मंत्रालयले निलम्बन गरेको हो।

जेठ १ गते शैल्य शिखर नगरपालिका दार्चुला सरुवा भएका कार्कीले त्यसको अवज्ञा गर्दै गौर नगरपालिकामै कामकाज जारी राखेपछि मन्त्रालयले उनलाई निलम्बन गरेको हो ।

संघीय मामिला तथा सामान्य प्रशासन मन्त्रालयले कार्कीको सरुवा गर्दै सरोजकुमार लाल दासलाई जेठ १७ गते गौर नगरपालिकाको निमित्त प्रमुख प्रशासकिय अधिकृत तोकेर जेठ १७ गते पठाएको थियो । तर, कार्कीले मन्त्रालयको निर्णय विपरीत आफूखुशी पवन महतोलाई निमितको जिम्मेवारी तोकेका थिए ।

मन्त्रालयले पछिल्लो पटक खटाएको कार्यालयमा तीन दिनभित्र हाजिर हुन लिखित तथा मौखिक निर्देशन दिंदा समेत कार्कीले अटेरी गरेपछि निजामति सेवा ऐन, २०४९ को दफा ६४ (१) बमोजिम दुई महिनाका लागि कार्कीलाई निलम्बन गरिएको मन्त्रालयका सचिव यादवप्रसाद कोइरालाले जानकारी दिएका छन् ।

सरुवा भएको कर्मचारी गैरकानूनी रुपमा नगरपालिकामा कामकाज गर्न आएको भन्दै गौरका स्थानीय युवाहरूले शुक्रबार नगरपालिका अगाडि प्रदर्शन गर्दै प्रमुख जिल्ला अधिकारीमार्फत प्रधानमन्त्री कार्यालयलाई ज्ञापन पत्र बुझाएको थियो । पाँच पटकसम्म सरुवा हुँदा पनि तोकिएको स्थानमा नगएर गौर नगरपालिमामै बसे पछि बेथितिको विरोधमा प्रदर्शन गरेको युवा विक्रान्त विक्रम नेपालले बताएका छन् ।