साझासँगको एकताप्रति असहमति राख्दै उपाध्यक्षसहित एक समुहले छाड्यो विवेकशील

काठमाडौं । विवेकशील नेपाली दल र साझा पार्टीबीच पार्टी एकताको प्रक्रिया अन्तिम चरणमा पुगेको बताइएको बेला विवेकशीलकी उपाध्यक्ष अजिता राईसहितको टोलीले पार्टी छोडेको छ।

साझा पार्टीसँगको एकतामा सहभागी नहुने भन्दै राईसहितको टोलीले विवेकशील छोडेको हो।  राईले भनिन् पार्टी एकताको विषयमा फरक मत रहेको र त्यो सम्बोधन नहुने भएपछि अलग भएको बताइन्।

‘हामी १३ जना त्यहाँबाट अलग भएका छौँ,’ उनले भनिन्, ‘विगतमा रहेका समस्याहरु अहिले नै सबै हल नगरी पुन: एक हुन जान नहुने कुरा हामीले राख्दै आएका थियौँ। कम्तीमा एक भइसकेपछि सबै कुराहरू मिलाएर दीर्घकालीन एकता हुनुपर्छ भन्ने हाम्रो कुरा थियो। तर, यहाँ हतार गरेर अरूको कुरा नसुन्ने भएपछि हामी अलग हुनु नै उपयुक्त लाग्यो।’

‘विवेकशील नेपाली दल तथा साझा पार्टीबीच एकताको विषयमा दुई दलका वार्ता समितिले सहमति गरेको सम्झौतापत्रमा विवेकशील नेपाली दलका सदस्यहरूले विवेकशील नेपाली दलको विधान तथा नियमावलीबमोजिम मतदान गरी अनुमोदन गरेकोले विवेकशील नेपाली दलको यो स्वरूपको यात्राको चरण समाप्त भएको छ’ राई नेतृत्वकाे टाेलीले भनेकाे छ।

विवेकशील छोड्नेमा उपाध्यक्ष अजिता राई, सचिव (व्यवस्थापन) संगीता बाटाजु, संघीय समिति सदस्यहरू कर्मा लामा तामाङ, छिरिङ तामाङ, विजय बाबु सिवाकोटी, जेसन वैद्य, शिशिर राई, जमाल अली, आशिष राई, ज्ञानेन्द्र निरौला, साधना थुलुङ राई, शशि विक्रम कार्की, आलोक सुवेदी छन्।
साझासँगको एकतामा १३ जना सदस्य बाहिरिएपछि अब विवेकशीलबाट संघीय समितिमा रहेका २२ जना मात्रै सहभागी हुनेछन्। विवेकशीलको संघीय समिति सदस्यमा ३५ जना थिए।

दुई वर्ष अघि फुटेको साझा र विवेकशील पुन एक हुन लागेका छन्।  एकीकृत पार्टीको नाम विवेकशील साझा पार्टी राख्ने सहमति भइसकेको र चुनाव चिन्ह तराजु रहने दुई पार्टीबीच सहमति भइसकेको छ। दुवै पार्टीले पार्टी एकताको लागि वार्ता समिति गठन गरी छलफल अघि बढाएका थिए। एकतापछिको पार्टीमा साझाका संयोजक रवीन्द्र मिश्र अध्यक्ष र विवेकशीलका अध्यक्ष मिलन पाण्डे संयोजक रहने बताइएको छ। वरीयता क्रममा मिश्र पहिलो नम्बरमा र पाण्डे दोस्रो नम्बरमा रहनेछन्।

पार्टी एकतापछि केन्द्रीय समितिमा दुवै पार्टीबाट बराबर ६५/६५ जना सदस्य हुनुपर्ने माग उठाइएको छ। पार्टी एक भइसकेपछि नेताहरूलाई जिम्मेवारी हेरफेर गर्न कार्यदल बन्ने र सोही कार्यदलले प्रदेश र जिल्लाको एकीकरणको काम पनि टुंग्याउने सहमति दुई पार्टीबीच भइसकेको छ। पार्टी एकीकरण भएको ६ महिनाभित्र एकता महाधिवेशन  गर्ने सहमति पनि दुई पार्टीबीच भइसकेको छ।

२०७४ सालमा भएको स्थानीय निर्वाचनमा फरक-फरक पार्टीबाट निर्वाचनमा भाग लिएका साझा र विवेकशील पार्टी २०७४ साउनमा एक भएका थिए। संघीय निर्वाचनमा संयुक्त पार्टीको रूपमा चुनाव लडेका यी दुई पार्टी २०७५ पुसमा विभाजनमा पुगेका थिए। गत मंसिरमा भएको उप-निर्वाचनमा पनि दुई दल फरक-फरक उम्मेदवार बनाएर चुनाव भिडेका हुन्। उनीहरूले चर्चा भए अनुसारको मत नपाएपछि पुन: एकताको विषयमा छलफल थालेका थिए।

Comments