प्रधानमन्त्री देउवाले फेर्न मानेन नेकपा एसका मन्त्री

गतिविधि

- न्युज नेपाल

काठमाडाैं । प्रधानमन्त्री शेरबहादुर देउवाका कारण मन्त्री हेरफेर नहुने भएको छ ।

नेकपा एकीकृत समाजवादीका चार मन्त्रीहरुले चर्को दबाब सिर्जना गरेपछि प्रधानमन्त्री देउवा मन्त्री हेरफेर गर्नबाट पछि हटेका हुन् ।

नेकपा एकीकृत समाजवादीको सचिवालय बैठकले नयाँलाई अवसर दिने भन्दै हालका मन्त्रीहरुलाई फिर्ता बोलाउने निर्णय गरेको थियो । तर, मन्त्रीहरुले प्रधानमन्त्रीसहित नेकपा माओवादी केन्द्रका अध्यक्ष प्रचण्डलाई भेटेर दबाब दिएपछि अन्ततः उनीहरुको पद थमाैती हुने भएको हो ।

समाजवादीमा हालका मन्त्रीहरुको बाहुल्यता रहेका कारण समेत गठबन्धन जोखिममा पर्न सक्ने भन्दै देउवा मन्त्री हेरफेरमा हच्किएको बालुवाटार स्रोतको दाबी छ । तर, आइतबार बिहानको छलफलको क्रममा देउवा र माधव नेपालबीच मन्त्री हेरफेर गर्ने सहमति जुटेको थियो । त्यसपछि नेपालले पार्टी सचिवालय बैठक डाकेर निर्णय गरेर पठाएका थिए ।

यस्तै, आज बालुवाटारमा बसेको तीन शीर्ष नेताहरुको छलफलले समेत बजेट पारित नहुन्जेल मन्त्री हेरफेर राम्रो नहुने भन्दै तत्कालका लागि रोकेका हुन् ।

समाजवादीले नयाँ मन्त्रीको रूपमा जीवनराम श्रेष्ठलाई संस्कृति, पर्यटन तथा नागरिक उड्डयन, मेटमणि चौधरी सहरी विकास, शेरबहादुर कुँवरलाई श्रम तथा रोजगारमन्त्रीमा पठाउने निर्णय गरेको थियो । स्वास्थ्य तथा जनसंख्या राज्यमन्त्री रहेका भवानी खापुङलाई स्वास्थ्यमन्त्रीमा बढुवा गरेर प्रधानमन्त्रीलाई नाम सिफारिस गरेको थियो । स्वास्थ्य राज्यमन्त्रीमा हिराचन्द्र केसीलाई पठाउने निर्णय गरेको थियो ।

एकीकृत समाजवादीले पर्यटनमन्त्रीबाट प्रेमबहादुर आले, स्वास्थ्य मन्त्रीबाट विरोध खतिवडा, सहरी विकासमन्त्रीबाट रामकुमारी झाँक्री र श्रममन्त्रीबाट कृष्णकुमार श्रेष्ठलाई फिर्ता बोलाउने निर्णय गरेको थियो ।