प्राधिकरणका महानिर्देशक अधिकारीलाई पर्यटन मन्त्रीको दोस्रो स्पष्टीकरण

समाचार

- न्युज नेपाल

काठमाडाैँ । संस्कृति, पर्यटन तथा नागरिक उड्डयन मन्त्री सुदन किरातीले नेपाल नागरिक उड्डयन प्राधिकरणका महानिर्देशक प्रदीप अधिकारीलाई दोस्रोपटक स्पष्टीकरण सोधेका छन् ।

मन्त्री किरातीले मन्त्रीस्तरीय निर्णयबाट ११ असारमा ७ दिनभित्र जवाफ दिनु भनि सोधेको ९ बुँदे स्पष्टीकरणलाई अधिकारीले बेवास्ता गरेपछि मन्त्रीले पुनः ३ दिने स्पष्टीकरण सोधेका हुन् ।

मन्त्री किरातीले बुधवार २० असारको मन्त्रिस्तरीय निर्णयअनुसार के कति कारणले यस अघि सोधिएको स्पष्टीकरणको जवाफ नपठाएको हो स्पष्ट जवाफ ३ दिन भित्र लेखेर पठाउन भनेका छन् ।

अन्यथा कानूनअनुसार प्रक्रिया अगाडि बढ्ने व्यहोरा पत्रमा उल्लेख गरिएको पनि स्पष्टीकरणमा उल्लेख छ ।

अधिकारीले भने प्राधिकरण स्वायत्त संस्था भएकाले मन्त्रीलाई स्पष्टीकरण दिनु नपर्ने र मन्त्रालय सरकारसँग समन्वय गर्ने माध्यम मात्रै भएको भन्दै स्पष्टीकरण दिएका थिएनन् ।

मन्त्री किरातीले सोधेको स्पष्टीकरण नदिए कानूनअनुसार कारवाही हुने उल्लेख गरेका छन् । अधिकारीलाई सरकारले ४ वर्षको लागि महानिर्देशक नियुक्त गरेको भए पनि सरकारले चाहे जुनसुकै बेला पनि पदबाट हटाउन सक्ने व्यवस्था छ ।