‘विमानस्थलबाट बरामद सुनमा मेरो संलग्नता पुष्टि भए कानुनी सजाय भोग्न तयार छु’: दीपक मल्होत्रा

समाचार

- न्युज नेपाल

काठमाडाैँ । सुन व्यवसायी दीपक मल्होत्राले मंगलबार त्रिभुवन अन्तर्राष्ट्रिय विमानस्थलबाट बरामद भएको सुन आफ्नो नभएको बताए।

आज दिउँसो पत्रकार सम्मेलन गर्दै व्यवसायी मल्होत्राले विमानस्थलबाट बरामद सुनमा आफ्नो कुनै सम्बन्ध नरहेको सपष्ट पारेका हुन्।

उनले भने, ‘मेरो संलग्नता पुष्टि भए म सबै कानुनी सजाय भोग्न तयार छु। मंगलबार बरामद भएको करिब एक क्विन्टल सुन व्यवसायी मल्होत्राको भएको समाचार प्रकाशित भएका थिए।

मल्होत्राले उक्त समाचारमा आफ्नो तस्बिर राखिएको र यसबारे आफूलाई सम्पर्क पनि नगरेको दाबी गर्दै आपत्ति जनाएका थिए। विमानस्थलबाट भन्सारसमेत जाँचपास भएर बाहिरिएको करिब सय केजी सुन राजस्व अनुसन्धान विभागले बरामद गरेकाे थियाे।

मोटरसाइकल/स्कुटरको ब्रेकसु तथा दाह्री काट्ने रेजरमा लुकाएर हङकङबाट तस्करी गरिएको उक्त सुन विमानस्थलस्थित भन्सार कार्यालयअगाडिबाट ट्याक्सीमा लैजान लाग्दा बरामद गरिएको थियाे। प्रारम्भिक अनुसन्धानमा सो सुन व्यवसायी दीपक मल्होत्राको भएको देखिएको अनुसन्धानमा खटिएका अधिकृतहरूको भनाइ थियाे।