अफगानिस्तानलाई २ रनले हराउँदै श्रीलंका एसिया कप क्रिकेटको सुपर फोरमा

खेलकुद

- न्युज नेपाल

काठमाडौं । एसिया कप क्रिकेटमा गएराति भएको रोमाञ्चक खेलमा अफगानिस्तानलाई २ रनले हराउँदै श्रीलंका सुपर फोरमा पुगेको छ । समूह ‘बी’ बाट अपराजित रहँदै श्रीलंका सुपर फोरमा पुगेको हो । हारसँगै अफगानिस्तान बाहिरिएको छ ।

जितको लागि २ सय ९२ रनको लक्ष्य पछ्याएको अफगानिस्तान ३७ ओभर ४ बलमा २ सय ८९ रनमा अलआउट भयो ।यो लक्ष्य अफगानिस्तानले ३७ ओभर १ बलमा पुरा गरेको भए सुपर फोरमा पुग्ने थियो ।त्यस्तै नियम अनुसार बाँकी तीन बलमा एक छक्का हान्न सकेमा पनि अफगानिस्तान सुपर फोरमा पुग्न सक्ने अवस्था थियो ।

तर दोस्रो र तेस्रो बल डट भयो । चौथो बलमा फारुकी एलबीडब्लू आउट भएपछि श्रीलंका विजयी भयो ।त्यसअघि मुजिब उर रहमान आउट भएपछि अफगानिस्तान दबाबमा परेको थियो ।अफगानिस्तानका मोहम्मद नाबीले सर्वाधिक ६५ रन बनाएपनि त्यो जितका लागि पर्याप्त हुन सकेन ।श्रीलंकाका कसुन रजिथाले ४ विकेट लिए । दुनिथ वेलालेगे र धनन्जय डि सिल्भाले समान दुई विकेट लिए ।