जोखिममा रहेकालाई सुरक्षित स्थानमा सारियो, कियरगिभरमा कार्यरत सबै नेपाली सुरक्षित

समाचार

- न्युज नेपाल

काठमाडौं । परराष्ट्रमन्त्री एनपी साउदले इजरायलमा जोखिममा रहेका नेपालीहरूलाई सुरक्षित स्थानमा राख्नका लागि निरन्तर पहल भइरहेको बताएका छन्।

मंगलबार बिहान सिंहदरबारमा बसेको संसदको अन्तरर्राष्ट्रिय सम्बन्ध र पर्यटन समितिको बैठकमा इजरायलको पछिल्लो घटनाक्रमका सम्बन्धमा जानकारी गराउँदै मन्त्री साउदले ५५ जना नेपालीलाई सोमबार इजरायल सरकारको सहयोगमा सुरक्षित स्थानमा स्थानान्तरण गरिएको जानकारी दिएका हुन्। मन्त्री साउदले जोखिममा रहेका अन्य विद्यार्थीहरूलाई सुरक्षित स्थानमा राख्नका लागि पहल भइरहेको बताए।

मन्त्री साउदले इजरायलको दक्षिण क्षेत्रको तुलनात्मकरुपमा जोखिमयुक्त क्षेत्रमा आश्रय लिइ राखेका सुदूरपश्चिम विश्वविद्यालयका ३२ जना र कृषि तथा वन विज्ञान विश्वविद्यालयका २३ जना गरी ५५ जनालाई सुरक्षित स्थानमा स्थानान्तरण गरिएको बताए।

उत्तर क्षेत्रमा रहेका फार्म हाउसमा रहेका केही नेपालीहरूलाई पनि सुरक्षित तवरले बंकरमा रहने व्यवस्था मिलाइएको मन्त्री साउदले जानकारी दिए।

उनले भने,’समन्वय र सहजीकरणका लागि परराष्ट्र मन्त्रालय र राजदूतावासका पदाधिकारीहरूलाई सम्पर्क व्यक्ति तोकी नागरिकहरूको गुनासो सुनुवाइ गरी आवश्यक सूचना प्रवाह गर्ने एवं पीडित र आफन्तको कुरा सुनेर सोही बमोजिम समाधानको लागि पहलकदमी लिने,सुझाव प्रदान गर्नेलगायतका कार्यहरू निरन्तररुपमा गर्दै आएको छौं।’

उनले नेपाल फर्कन चाहनेलाई नेपाली राजदूतावासबाट विवरण संकलनका लागि अनलाइन रजिष्ट्रेसन सुरू गरिएको र हालसम्म दुई सय बढीको विवरण प्राप्त भइसकेको जानकारी गराए।

मन्त्री साउदले उद्धार लागि नेपाल एयरलाइन्स र हिमालय एयरलाइन्सका जहाजहरू तयारी अवस्थामा राखिएको बताए।