अर्थतन्त्र लयमा फर्काउन ‘र्‍याडिकल रिफर्म’ जरुरी छः प्रधानमन्त्री प्रचण्ड

समाचार

- न्युज नेपाल

काठमाडाैँ । प्रधानमन्त्री पुष्पकमल दाहाल प्रचण्डले मुलुकको अर्थतन्त्र सुधारका लागि आमूल परिवर्तन (र्‍याडिकल रिफर्म) जरुरी रहेको बताएका छन् ।

अर्थतन्त्रको समस्या समाधानका लागि सरकार, उद्योगी व्यवसायी र राजनीतिक दलका प्रतिनिधिलाई समावेश गरेर संयन्त्र बनाउने तयारी रहेको उनले बताए ।

नेपाल उद्योग वाणिज्य महासंघले बिहीवार राजधानीमा आयोजना गरेको राष्ट्रिय आर्थिक बहस कार्यक्रमलाई सम्बोधन गर्दै प्रचण्डले अर्थतन्त्रको समस्या समाधानका लागि सरोकारवाला सबै रहेको संयन्त्र बनाउन लागेको बताएका हुन् ।

‘अर्थतन्त्रमा हामीले जुन समस्याको सामना गरेका छौं, एउटा संयन्त्र बनाएर त्यसलाई समाधान गरौं भन्ने महासंघको प्रस्तावमा सरकार सकारात्मक छ’ प्रधानमन्त्रीले भने, ‘देशमा फैलिएको निराशा र अविश्वासलाई विश्वास र भरोसामा बदल्न सबैका प्रतिनिधि समावेश गरेर एउटा संयन्त्र बनाऔं । जहाँ र ज्ञान सामूहिक विवेकको केन्द्रिकृत अभिव्यक्ति होस ।’

अर्थमन्त्री स्वदेश फर्केपछि अर्थतन्त्रको समस्या समाधानका लागि विज्ञसहितको संयन्त्र बनाउने उनले बताए । प्रचण्डले नेपालको अर्थतन्त्रको समस्या श्रीलंकाजस्तो नभएकोले मौलिक ढंगले नै समाधान गरिनुपर्ने बताए । ‘म भर्खर प्रधानमन्त्री बनेको समयमा देश श्रीलंकाको बाटोमा जान लाग्यो भनेर त्रास सृजना गर्नै खोजिएको थियो । मैले नेपाल श्रीलंका हुने अवस्थामा छैन, त्यसको तुलना गरेर जनतालाई आतंकित बनाउनु हुँदैन भनेको थिएँ’ प्रचण्डले भने, ‘नेपाललाई कता लैजाने भन्ने निर्णायक हामी आफैं हो, राजनीतिक दल र अर्थविद्ले गर्ने हो । पोलिटिक्सले नै सबैलाई गाइड गर्ने हो ।’

देशको अर्थतन्त्रलाई लयमा फर्काउन बोल्ड डिसिजन जरुरी भइरहेको उनले बताए । ‘रेभ्युलुसन त भन्दिनँ तर अर्थतन्त्रलाई लयमा फर्काउन र्‍याडिकल रिफर्म जरुरी छ’ प्रचण्डले भने ।