विमानस्थलमा प्रहरी र कर्मचारीहरूबिच कुटपिट प्रकरणबारे छानबिन अन्तिम चरणमा

समाचार

काठमाडौं । त्रिभुवन अन्तर्राष्ट्रिय विमानस्थलमा शुक्रबार भएको कुटपिट प्रकरणको छानबिन अन्तिम चरणमा पुगेको छ । घटना छानबिन गर्न गठित समितिले कुटपिटमा संलग्न प्रहरी र अध्यागमनका कर्मचारीहरूसँग बयान लिइरहेको छ ।

बयान सकिए लगत्तै घटनाको प्रतिवेदन बुझाउने समितिको तयारी छ । प्रतिवेदनले दिएको तथ्यको आधारमा संलग्न कर्मचारीहरूलाई कारबाही गर्ने मन्त्रालयका एक जना उच्च अधिकृतले बताए ।

गत माघ १२ गते गृह मन्त्रालयका सहसचिव थानेश्वर गौतमको संयोकत्वमा उपप्रधान एवं गृहमन्त्री नारायणकाजी श्रेष्ठले छानबिन समिति गठन गरेका थिए । समितिमा प्रहरी नायब महानिरीक्षक राजेशनाथ बास्तोला तथा सीमा तथा अध्यागमन प्रशासन शाखाका उप–सचिव कुलबहादुर जिसी सदस्य छन् ।

३ दिनको समय पाएको समितिले घटनामा संलग्नहरूसँग बयान लिने र क्लोज सर्किट (सीसी) क्यामराको फुटेज विश्लेषण गरिरहेको छ । गृह मन्त्रालयका प्रवक्ता सहसचिव नारायणप्रसाद भट्टराईका अनुसार समितिलाई थप एक दिनको समय दिइएको छ । जसअनुसार घटनाको छानबिन प्रतिवेदन समितिले मंगलबार बुझाउनेछ ।

गृह मन्त्रालयमा प्रहरी र अध्यागमनका कर्मचारीलाई समितिले बयान लिइरहँदा त्रिभुवन अन्तर्राष्ट्रिय विमानस्थलमा कर्मचारीहरू कालोपट्टी बाँधेर काम गरिरहेका छन् । विमानस्थल अध्यागमन कार्यालयका कर्मचारीले विरोध स्वरूप ‘कालोपट्टी’ बाँधेर काम गरिरहेको अध्यागमन विभागका महानिर्देशक रुद्रसिंह तामाङले जनाए ।