आईएफआरसीको महासचिवमा पुनः चापागाईं

काठमाडौं । विश्वभर मानवीय सेवा गर्ने सञ्जाल भएको संगठन रेडक्रस तथा रेडक्रिसेन्ट सोसाइटीको अन्तर्राष्ट्रिय महासंघ (आईएफआरसी)को महासचिव तथा प्रमुख कार्यकारी अधिकृत पदमा जगन चापागाईंले दोस्रो कार्यकालका निम्ति कार्यभार सम्हालेका छन् । उनी दक्षिण एसिया एवं नेपालबाट सो पदमा पुग्ने पहिलो नेपाली हुन् ।

पहिलोपटक सन् २०२० फेब्रअरी २ मा चापागाईंले उक्त पदको पहिलो चारवर्षे कार्यकाल सम्हालेका थिए । स्वीट्जरल्यान्डको जेनेभामा गएको वैशाखमा सम्पन्न आईएफआरसीको गभर्निङ बोर्डको बैठकबाट पहिलो पदावधि समाप्त हुनु एक वर्षअगाडि नै दोस्रो कार्यकालका निम्ति उनको समयावधि थप गर्ने निर्णय गरिएको थियो । सो बोर्डमा विश्वका २९ देश सहभागी हुने जनाइएको छ ।

अब चापागाईं सन् २०२८ को जनवरीसम्म आईएफआरसीको महासचिव तथा प्रमुख कार्यकारी अधिकृत पदमा रहनेछन् ।

आईएफआरसीमा आबद्ध देशीय रेडक्रस र रेडक्रिसेन्ट सोसाइटीका स्वयंसेवक तथा कर्मचारी पछिल्ला वर्षमा कोभिड–१९ महामारीको प्रतिकार्यमा अग्रपंक्तिमा जुटेका थिए । आईएफआरसीले आफ्नो कार्यादेशानुसार जलवायु परिवर्तनले निम्त्याएका र प्राकृतिक तथा मानव सिर्जित विपद् न्यूनीकरण तथा पीडितलाई अनवरत रूपमा मानवीय सहयोग गरिरहेको छ ।

महासचिव चापागाईंले मानवीय सेवाका क्षेत्रमा पुर्‍याएको काम तथा कुशल नेतृत्वले आईएफआरसीका सदस्य देशमा उच्च प्रशंसा कमाउँदै आएको छ ।

दोस्रो कार्यकालको पदावधि थप गर्ने निर्णयपछि महासचिव चापागाईंले भने, “आईएफआरसीको गभर्निङ बोर्ड र आईएफआरसीका अध्यक्ष केट फोर्ब्सको विश्वास पाउँदा म सम्मानित र गौरवान्वित छु । यो ठूलो जिम्मेवारी हो र त्यहाँ थुप्रै चुनौती हुनेछन् । तर, हामी समाधान खोज्न तथा हामीले सेवा गर्ने समुदायका बीचमा विश्वास निर्माण गर्न निष्ठाका साथ काम गर्नेछौँ ।”

तीन दशकभन्दा बढी मानवीय सेवामा अनवतर रूपमा तल्लीन चापागाईंले गत वर्ष नेपाल भ्रमणका क्रममा नेपाल रेडक्रस सोसाइटीलाई ३० नयाँ एम्बुलेन्स र १५ स्तरोन्नति गरिएका एम्बुलेन्स हस्तान्तरण गरेका थिए । विश्वका १९२ देशका रेडक्रस आईएफआरसीमा आबद्ध छन् ।

सल्फेरिनो युद्धका पीडाले छट्पटाइरहेकालाई मानवीय सेवा स्वतःस्फूर्त प्रदान गर्न जँ हेनरी ड्युनाले सन् १८६३ मा रेडक्रस स्थापना गरेका थिए । युद्ध र युद्धका परिणाम, प्राकृतिक तथा मानव सिर्जित विपद्, विपद्ले सिर्जना गरेका असर, गरिबी, भोकमरी, विषमता न्यूनीकरण, संकटापन्न समुदायलाई उत्थानशील बनाउनेलगायत क्षेत्रमा आईएफआरसीले मानवीय सहायता प्रदान गर्छ ।

सात लाखभन्दा बढी कर्मचारी र झन्डै दुई करोड स्वयंसेवकको माध्यमबाट करिब एक अर्ब जनसंख्यामा बर्सेनि आईएफआरसीले मानवीय सहायता पुर्‍याउने गरेको छ । साथै, रेडक्रस अभियानले मूलभूत रूपमा मानवता, निष्पक्षता, तटस्थता, स्वाधीनता, स्वयंसेवा, एकता र विश्वव्यापकताजस्ता सात आधारभूत सिद्धान्तद्वारा निर्देशित भई सेवा गर्ने गर्छ ।

Comments